گئدیرم
Gedirəm
Gedirəm özgə yarin şəmınə pərvanə olam
Sevgimə layiq olan dilbərə divanə olam
Bilmədin qədrimi sən çoxli mənə zulm elədin
Gedirəm ey daş ürək mən sənə biganə olam
Aqiliydim sənin eşqində belə mən dəli oldum
Yöxdi imkan ki dönüb bir daha fərzanə olam
Indi ki üz çövurub talee fərzanaliğim
Gedirəm mən mey içəm sakine meyxanə olam
Mənə leyla gerək olsun nə gözəl sevməli yar
Gedirəm məcnuna tay eşqidə əfsanə olam
Demədim bunlari ta sən mənə duşmən olasan
Bulgunən istiyirəm mən kimə jananə olam
Şair Vəhid Şukrzadə
گئدیرم
گئدیرم اؤزگه یارین شمعینه پروانه اولام
سئوگیمه لاییق اولان دیلبره دیوانه اولام
بیلمه دین قدریمی سن ، چوخلی منه ظولم ائله دین
گئدیرم ای داش اورک من سنه بیگانه اولام
عاقیلیدیم سنین عشقینده بئله من دلی اولدوم
یوخدی ایمکان کی دؤنوب بیر داحا فرزانه اولام
ایندی کی اوز چؤووروب طالع فرزانه لیغیم
گئدیرم من می ایچم ساکین میخانه اولام
منه لیلا گرک اولسون ، نه گوزل سئوملی یار
گئدیرم مجنونا تای عشقیده افسانه اولام
دئمه دیم بونلاری تا سن منه دوشمن اولاسان
بولگونن ایستییرم من کیمه جانانه اولام
شاعیر : وحید شکرزاده
بو شعری شاعیرین اؤز سسینده دانلود ائدین