دوزلی اوغلان آذربایجانی تورکی شعر موزیک

بير قورقى عالمده، قورولدى كربلاده‏

يوخدى اونا تاى، هيچ فضاده، هيچ سماده‏

 

 بير عدّه انسان، اول دياره يول تاپوبلار

عالمده بير خاص جوهريله، خط  يازوبلار

 

 بير عدّه، خَلّاق فِعال عشق و اخلاص‏

خاك و گلينن يازدولار، بير جمله خاص

 

بير گونده انسانلار، ملايك دن يِى اولدى‏

بير كس، مَطاف جبرئيل و هر شى اولدى‏

 

 اللّه اكبر، باخ مقام جان پاكه‏

عطشان عالم، ساقى اولدى، آبه خاكه 

 

القصه بير طوفان ظلمت، باش قوپادّى‏

بير عدّه زقّوم طينتى، يردن چيخادّى

 

شيطانى انسانه، مسلّط إدّى قاتدى‏

باخ حكمته نورى چوخاتدى، ظلمت آرتدى

 

هركس مسيرينده، تاپوب رشد و رشادت‏

انسان سعادتلر تاپوپ، شيطان شقاوت

 

فُرقان عالم ايستَدى، پيس ياخشى سِشسون‏

مؤمن قاناد آشسون، گناه بد ذاتى إشسون

 

حاكم إراده إيلدى، حُجّت قوتولسون‏

تاآخرين قورقى، قيامتده قورولسون

 

بير عِدّه آى تك، شير اولادى، دوروبدور‏

بير پارچا نوردان كاروان، خيمه ووروبدور

 

 من بولمورم گوى لر، نه گوردى، نه اشيدّى‏

بوچهرلردن آيرى بير قدّ، قامت ادّى

 

 گويده ملك لر، دسته دسته ناظر اولدى‏

يرده اجنّه لشكرى، تز حاضر اولدى

 

يوز ايرمى دوت مين، روحِ پيغمبر دوزولدى‏

آل محمد نازل اولدى، گون سوزولدى

 

 آل محمد صف چكوب، اوردا داياندى‏

عاشورادا، دنيا عجب نوره اوياندى

 

فوج ملايك، دالبادال صف دور چكيلّر

زعفر اميرى أمر إدور، جن لر گليرلر

 

بير عدّه كور، غفلتده يولّارى كسيلّر

خيردا اوشاقلار، لشكرى گورجاخ أسيلّر

 

سس‏لر اوجالدى خيمه لر، بير بير قوشوندى‏

گوردى حسينين لشكرى،  ساغ سول قوشوندى‏

 

بير صحنه‏اى اُول كربلاده، حاكم اُولدى‏

اَللّهْ شاهددور، قيامت قائم اولدى

 

بير مرد، بير نامرد، ميداندا داياندى‏

بير سيّد آل محمد، ألده جاندى

 

تاريخ عالمده، بير اوضاع حاكم اُولدى‏

تفسير خونين، بير آقايه لازم اُولدى

 

هستى ده بير، مخصوص عبادت جور اُولوردى‏

سيماى پيغمبر، ملك، ناجور اُولوردى

 

اسرار خلق آدمى، تحليل اولوردى‏

اوج عبادت، عرصده تكميل اولوردى

 

 كلّ خلايق، امتحانه گوز تيكيردي

عرفان و توحيد إمامه گوز تيكيردي

 

 

 اللّه امرى، صادر اولدى، يا حسين جان‏

محفوظ دور شأنون، صاحب اختيارسان

 

عرض إدى يارب، راضيم، گوندر بلانى‏

يوخدر اوركده، اضطرابون هيچ نشانى

 

عرض ادّى يارب، مرگينن هم خانه‏يم من‏

يارب كمال عشق ده، مردانه‏يم من

 

عرض ادّى يا رب، إذن وردوم، طوفان اولسون‏

دلبسته‏گى اولسا حسينده، قوى قوتولسون

 

 عرض ادّى يا رب، امتحانى يولّا قورتار

ايله تَجلىَّ، طور زهرانى داغود، يار

 

من شاهباز اُوج بى عيب إلهم

من پرده دار پرده غيب إلهم

 

من جلوه اسماء، صفات و هر فِعالم

إراده‏يم، مشيّتم من هر كمالم

 

سرّ تمام اسم و رسمه، عارفم من

شأن و مقام خلقده، چوخ سالفم من

 

 من مظهر اسم قديرم، قدرتيم وار

لشكر منم اسم جلال و هيبتيم وار

 

 لشكر منم اسم عليم و من  خبيرم

لشكر سميعم، من حكيمم، من بصيرم

 

خلقه نشان بى نشانم، من حسينم

سيمرغ قاف كهكشانم، من حسينم

 

لشكر منم، روز ألستده أل توتان قول

شاهد منم، من عهد إدن، هم عهد آلان قول

 

 حقّا زبان حق منم، روز أزلدن

ألحق تمام حق منم، من لَمْ يَزَلدن

 

لشكر أُوزوم پيمان و عهدم، هم وفايم

مردم، بويوك قربانى‏ام، ذبح خدايم

 

 لشكر منم من، ساقى فيض حقيقت

لشكر منم قران ناطق، من شريعت

 

لشكر منم يول، من صراطم، من طريقت

لشكر منم بدو طبيعت، من طليعت

 

لشكر حقيقت تشنه سى، نور حسين دور

أبد أزل  سر چشمه سى، نور حسين دور

 

 لشكر شهودون تشنه سى، نور حسين دور

احسان و جودون تشنه سى,نور حسين دور

 

لشكر تلاطم ايله، من اسم كبيرم‏

لشكر شجاعم، بى‏بديلم، بى‏نظيرم‏

 

 لشكر منم  من، حجّت اللَّه هالك‏

ايندى حسين دور، مظهر اسماى مالك‏

 

 لشكر غضب لنديم، جهنم شعله لندى‏

بير خشميله با خدوم، اوشعله قاره لندى،

 

    ***8

 آند اولسون اللّهه جهان نوروملا دوُلدى‏

بير جلوه، اون دورد نور إديبدى، عالم اُولدى‏

 

 آندوسون اللّهه بيزى، اللَّه يارادىّ‏

اُونان سورا هر نه اولوب، بيزدن سرآدّى‏

 

 لشكر بولون بيز بنده يوخ، أمّا إماموخ‏

بولمز داهى كس، صاحب هانسى مقاموخ‏

   

نور چهارده معصوم‏

 

قرآنى نازل إيلييَن، نور ولادور

إرسالى كامل إيليين، نور وِلادور

 

 دنيانى دنيا إيليين، نور ولادور

انسانى إحيا إيليين، نور ولادور

 

قوم ثمود و نوح و عادى، بيز داغودّوخ‏

مينلر جهانى بيز ياراّدوخ بيز آرودّوخ‏

 

 اللَّه مفردى، بولون «إنَّا» بيزيخ بيز

قرآن ناطق، كلمه عليا، بيزيخ بيز

 

هر سوره، هر حسن و بها، تنها بيزيخ بيز

هر جلوه، هر لطف و صفا، تنها بيزيخ بيز

 

نور خدا، روح خدا، تنها بيزيخ بيز

كون و مكان و ما سوى، تنها بيزيخ بيز

    ***

    از زُهدتا وصال

 

لشكر حسينه، نام و عنوان، مطرح اولماز

لشكر حسينه، حشمت و جان، مطرح اولماز

 

لشكر حسينه، مال دنيا، مانع اولماز

دِينه نه دنيا، بلكه عقبى‏ مانع اولماز

 

لشكر منى دلبسته‏گى‏لر، يولدا قويماز

هيچ وقت حسينى خسته‏گى‏لر، يولدا قويماز

 

لشكر حسين پيوسته‏گى‏دن، رسته قالماز

لشكر حسين بو امتحاندا، بسته قالماز

 

لشكر، بوگون روز كمالومدى، قيليش چك‏

به‏به بوگون روز  وصالومدى قيليش چك‏

 

لشكر بو موعود اُو يارومدى، قيليش چك‏

إتمام رنج، آغاز كارومدى، قيليش چك‏

 

من نى نيرم كون و مكانى، جاهل انسان‏

من طائر عرفانى‏ام، اى كاهل انسان‏

 

 من نى نيرم تختى و فرشى، من حسينم‏

من نى نيرم دنيانى، عرشى، من حسينم‏

    ***

 عرض ادّى يارب، وصلى مونّان گژ يتيرمه‏

پيوستى پيوستى داهى منّن گوتورمه

 

كون و مكان أمريله، اُولدى مثل سايه‏

اُونديدى لشكر پرچمى گدّى هوايه

 

لشكر تلاطم ايلدى گلدى صدايه‏

اى سيّد اولاد هاشم، گَل نوايه

 

آيا يزيدين امرينه، طاعت اديرسن‏

يا جنگى ايستيرسن، ره رزمه گديرسن

 

آشدى لبى اُول پورحيدر، شير صفدر

اى لشكر دون و دغل، ظلمتده يكسر

 

من ايليرم دعوت سيزى، اسلام پاكه‏

قورخون، دوشر سوز ذلّته عين هلاكه

 

سيزله منيم يوخدور نزاع ويوخدى جنگيم‏

سيز دعوت إدّيز گلميشم، يوخدى خدنگيم

 

گر استيرميرسيز، من گديم پيمان شكن لر

هاردا بوجور شاهه، او جور نقشه چكلّر

 

گر بيعت إدسز، حاضرم حقى دوغوردام

سيز غيرت إدسز گلميشم كفرى داغوردام

 

دنيايه گل وابسته اُولما، اُولما حيوان

دينين اساسى دور، وفا إد عهده انسان

 

أل ورمرم من ظلمه، نا اهله، پليده

باش اگمرم اُلسمده، گر مين يول، يزيده

 

 آزاده‏يم آزاده يم، واللّه مَردم

زهرا إِديب دور تربيت، عالمده فردم

 

منّن گليب جنگ إدميون، من بى گناهم

پاكم، قانوم چوخ چوخ آغوردى، دين پناهم

 

 لشكر نصيحت إدمدى قبول، آرى

هرنه ياغوش، ياغسا داشا، هيچ يوخدى بارى

 

 گوردى حسين، إتمام حُجّت اُولدى اُولدى

چوخ آز آدام گوز آشدى، هامّى كوردى، كوردى

 

 گُوردى حرام‏مين لقمه سى، پيس‏بَر بيتيردى‏

 هر كيم يدى مال حرام، حقى ايتيردى

 

كار سالمادى نور امامت، گوز توتولدى

بلى حرام، آخر ايشين گوردى قوتولدى

 

وِردى أمير فرمان، لشكر نعره چكسين

سسلر اوجالسون حق سسينه، طعنه چكسين

 

گوردى حسين، اول قوم راهىّ بلادور

ايندى فقط تكليف، جنگ كربلادور

    * * *

 

    فضايل‏

 

اُونديدى سس چكدى، بولون، شير خدايم

من زاده شير خدا، يَل مرتضايم

 

من سيّدم، من سرورم، من پاك پاكم‏

 من جنگ لرده،تيز  چنگم، خوفناكم‏

 

لشكر مگر سيز بولموسوز، من شوروشينم‏

 اى اهل عالم، من حسينم، من حسينم

 

 من آهوى باغ ولايم، من حسينم

محصول شير مصطفى‏ايم، من حسينم

 

 من زينت عرش خدايم، من حسينم

من سرور اهل وفايم، من حسينم

 

من ميوه قلبم، شفايم، من حسينم

 والاترين نورم، ضيايم، من حسينم

 

    نور حسين‏

 

من فاتخ سّر أزل، نور حسينم

خطّاط خطّ لم يزل، نورحسينم

 

هم أوّل و هم اخر و ظاهر منم من‏

 هم باطن و هم مُستَتِر بير سرّ، منم من

 

 من  همره نور أزل، تا انتهايم

بير گوهرم من، لَم يَزَل، چوخ پربهايم

 

 من امتحان قوم و من سر تمامم

هم مبتلى هم ابتلا هم احترامم

 

لشكر باذن الله  منم، صوت أَنا اللّه‏

موسانى من گوندرميشم، واللّه، باللّه

 

طوفان نوحى قاوزيان، نورومدى لشكر

كشتى نوحى ساخليان، نورومدى لشكر

 

دريانى ديوار ايليين، نورومدى لشكر

مردارى إحيا ايليين، نورومدى لشكر

 

 موسانى موسى ايليين، نورومدى لشكر

عيسانى عيسى ايليين، نورومدى لشكر

 

دنياده بى داد ايليين، نورومدى لشكر

 فرعونى غرقاب ايليين، نورومدى لشكر

 

 إعجازه إمداد ايليين، نورومدى لشكر

لاهوته پرواز ايليين، نورومدى لشكر

 

 هر معجزه، هر صاحب اعجاز إدوبدور

بى شك حسينه حاجتين، ابراز إدبدور

 

آدم حسادت ايلدى، دنيايه آدّوم

يونس سماجت ايلدى، دريايه آدّوم

 

يعقوب منى ياد إدمدى، هجراندا قالدى

يوسف منه باش أيمدى، زنداندا قالدى

 

 خشم جهنم خشميمه، تابع دى واللّه

چشم طبيعت، چشميمه تابعدى واللّه

 

لشكر، منيم نوروم، بوتون حورى يارادى

لشكر، حسين نورى بو دِيجورى يارادى

 

لشكر منيم تختيمدى، عرش اعظم حق

لشكر منيم روزومدى، روز محكم حق

 

لشگر منم گون، من آيام، من نور عينم

اى اهل عالم، زاده زهرا حسينم

 

لشكر منم من ، صاحب رجعت و حكمت

بوردا وارومدور بير بويوك نوعى حكومت

 

 

    شجاعت حسينى‏

 

 امّا جهاندا بير شجاعت، رسمى واردور

بير ده بوجسمين حيدر آدّا، اصلى واردور

 

 جسم حسينون غرّشى، ميدانى آلدى‏

رُعب حسينى، سينه لرده سايه سالدى‏

 

دينون حماسى شعرينه، ميزان او قوشدى‏

اُونديدى صفلر سينديلار، لشكر قووشدى‏

 

باشلار قلم اولدى، قالانّار آت دان آشدى‏

آتلار حسينى گوردى، آتلار، آت دان آشدى‏

 

اللَّه اكبر توز نه قاخدى، وضع نه، جاشدى‏

بيرلرزه دو شدى، يَل ده، دسته دسته قاشدى‏

 

 دست شجاعت، لنگر كفرى داغودى‏

شير شهامت، سنگر كفرى داغودى‏

 

عرفان و حكمت، شُبهه جهلى آپاردى‏

دست طهارت عرصدن، ننگى قوتاردى‏

 

 

اى لشكر غدّار، حيدر جنگه گلدى‏

غيض خدا غيرتلنيب دل، تنگه گلدى‏

 

اى مَرحَبُ و عَمرو، يَلان پير دلدار

بارز أُولون، بيرده على، آهنگه گلدى‏

 

اى صاحبان زور و قدرت، قدرتيز وار

بوردان گُذارى إيليون، يَل هنگه گلدى‏

 

شمشير چكدى بير نفر، لشكر قاروشدى‏

يوزمين قوشون، بيرأَل الينّن، تنگه گلدى‏

 

 باشلار قلم اولدى، قلم قولّار، توكولدى‏

اوندا نفاقون لانه سى، هفت سنگه گلدى‏

 

آتلار قووشدى، پهلوانلار، قالدى آرتدا

صيادلار صيّادى اللَّه، جنگه گلدى‏

 

ميدانى آلدى آغزونا، شير شجاعت‏

عاشورادا، دامان كفر، پيس ننگه گلدى‏

 

بير ساغ سولا، اوز قويدى بى كس، بير دولاندى‏

حلقوم خائن، خوش سيخيلدى، چنگه گلدى‏

 

بيرده تكان، شمشير سنگينه وريبدور

قلب عداوت، چوخ گوزل، آونگه گلدى‏

 

ميدانى سير إدّى، يامان قيردى، داغودّى‏

بو  بى مثل عُنقادى، هفت أُورنگه گلدى‏

 

رزم حسين، تكرار حيدر رزمين آشدى‏

بارى، جوان هاشمى، بير هنگه گلدى‏

 

 صيحه چكوبدور، غافلان مست مغرور

تا روز محشر، عرصه من سرهنگه گلدى‏

 

آرى، حسين قانلا  يودى، قانى او  چولده‏

اولدى گمان، مهدى بودور، ير رنگه گلدى‏

 

قانيله سيراب إيلدى صحرانى، عطشان‏

الحق نهنگ عرصه، خوش آهنگه گلدى‏

 

بير انقلابى قائم إدّى إبن طه‏

أوّل خبر، تاريخ هر فرهنگه گلدى‏

 

اوندا ملايك لر پرآچدى، گل سپيلدى‏

بلى، پيمبرلرده شوروشنگه گلدى‏

 

گر اولما سايدى اُو كرامت، اُو لطافت‏

لابد قيراردى لشكرى، دل زنگه گلدى‏

   

***

    مصيبت حسينى

 

 لشكر بودنيايه، گِنه گلّم دوباره‏

 عالى حكومت ايلرم، أرضه، سمايه

 

 امر حسينيله پيمبرلر، سر إيلَر

اوندا مقام و شانيمى،  خلق، باور ايلر

 

لشكر بودنيا، نوروما، بير گون إيشيلدار

أمّا اگر ايندى أُولم، عالم سيزيلدار

 

 لشكر مقاموم، قابَ قَوسَينِ خدادور

عالمده ثاراللّه، حسين كربلادور

 

لشكر قانوم خون خدا دور، بيرده فكر إد

لشكر جانوم روح بقادور بيرده فكر إد

 

لشكر اگر اُولسم، منه ير قانين آغلار

لشكر حسينين ماتمى، هر قلبى داغلار

 

 لشكر حسينين نورونى، دنيايه ساتما

لشكر بو نورون جسمينى، صحرايه آتما

 

لشكر ولى اُولسمده عالم، ساخلارام من

يوز تكّه اولسامدا، كرمنن قالمارام من

 

 آيا آنام زهرا، شهيد اولدى نه ادى

گِدّي إده نفرين، ولى يولدان قييدى

 

لشكر إدم من صبر، زهرادن سزايم

لشكر بولون من، زاده صبر و رضايم

 

ايندى كسين شمشيرلر، جان حاضر إدّيم

إحيا إدم دينى، جانان حاضر اديم

 

 لشكر، على اصغرى من حاضر إدّيم‏

شبه رسول اكبرى من، حاضر إدّيم‏

 

لشكر، گوزل ماه منيرى، حاضر إديم‏

عالملره لايق اميرى، حاضرإديِم‏

 

لشكر بو نورون كاروانى، بودا ميدان‏

سيندير بُلورين جامى، اى همسنگ شيطان‏

 

لشكر، من آللّه طاعتينده، جانى وِرّم‏

اللَّه دان اُوترى، عترت زهرانى وِرّم‏

 

بو طاعتيله توحيدى اثباته يتدوم‏

هرگونه شركى محو ادوب، پروازه گدّوم‏

 

بو شبهه خلق اولدى، جهان دوشدى فنايه‏

ألسّاعة، حِلْم إِلهام اولوب، قلب بقايه‏

 

أل ساخلادى شير خدا، خشم اودوبدور

رحم إيلدى دشمن‏لره، اوندا دوروبدور

 

قورخان، تلاطومنان قيوتوب، جان تاپوبدى‏

أللّر ايشه دوشدى، حسينه داش آتوبدى‏

 

اُوخلار دوزولوب رحم، كانون، قصد إديبلر

شمشير لر، خون إمامه دست إديبلر

 

يوزدن ده چوخ، زخم كلان، دَيدى إِمامه‏

چوخ نيزه، هم گُرز گران، ديدى امامه‏

 

خون خدادن، سنينه ده، چوخ چشمه چيخدى‏

قان آخدى آخدى، اول قدَر كى، جسمى ييخدى‏

 

اى واى عالم، باش سينيب سونّان كسيلدى‏

اُولْ يَل لباسون سُويدولار، الَّر بيچيلدى‏

 

 اى واى عالم، آتلارون نعلى، تازالدى‏

پشت پيمبر خم اولوب، بيرده قوجالدى‏

 

اللَّه اكبر نيزده، باشلار سارالدى‏

زهرا قوجالدى، زينبين زولفى آغاردى‏

 

اللَّه اكبر، خيمه‏نى، أُد گلدى آلدى‏

بير فاطمه اولادى، اوتلار آدّا قالدى‏

 

 چوخ با شهامت، شعليه زينب، تن آدّى‏

فرزند زهرانى، گوزل تاپدى، چيخادّى‏

 

هر بير طرفده، دشمن و آتدى، كى يادّى‏

هر كيم، هر انسانه، ألى يتدى، أل آتدى‏

 

 ناگه لباس و زينت و زيور، تالاندى‏

اوندا نه مال، كى احترام دين، جالاندى‏

 

 دشت بلاده، دفتر ديگر يازولدى‏

ناموس آل اللَّه، چو للرده پوزولدى‏

 

 او چولده ناموس امامت، ضربه گوردى‏

معجر گوتورلدى، قلبى لر چوخ طعنه گوردى‏

 

چوخ غملى گونلر، أوليا آواره قالدى‏

آواره آياقلار، يقين صدپاره قالدى‏

 

بو غصّه‏لى قصّه، هميشه أزبر اولدى‏

هر چند، قلم قورتولدى، دفتر پرپر اولدى‏