هارداسان گل
Hardasan gəl
Ayrılıqdan dağ başını aldı ahım hardasan gəl
Allahıma and içirəm yox gunahım hardasan gəl
Yandı gəlbim hicr odunda dərmanı yar təkcə sənsən
Ey təbibim nazlı yarım padışahım hardasan gəl
Fürqətindən qan içində qan içir divanə könlüm
Ey pərəstiş eylədiyim qibləgahım hardasan gəl
Çoxları olmuş pərişan o kaman qaş ox baxışdan
Ey kaman qaş ox baxışlı tək sıpahım hardasan gəl
Yar sevilmək çox çətindir məndə yoxdur böylə bir güc
Ey mənim sevdalara sevgi pənahım hardasan gəl
Mən xəta etdim yanıb hicranda hər gün pak olundum
Day qutardı yar cəzaye ıştıbahım hardasan gəl
Şair : Vəhid Şükürzadə
هارداسان گل
آیریلیق دان داغ باشینی آلدی آهیم هارداسان گل
آللاهیما آند ایچیرم یوخ گوناهیم هارداسان گل
یاندی قلبیم هیجر اودوندا ، درمانی یار تکجه سنسن
ای طبیبیم ، نازلی یاریم ، پادیشاهیم هارداسان گل
فرقتیندن قان ایچینده قان ایچیر دیوانه کونلوم
ای پرستیش ائیله دییم قیبله گاهیم هارداسان گل
چوخلاری اولموش پریشان او کامان قاش اوخ باخیش دان
ای کامان قاش اوخ باخیشلی تک سیپاهیم هارداسان گل
یار سئویلمک چوخ چتیندیر ، منده یوخدور بؤیله بیر گوج
ای منیم سئودالارا سئوگی پناهیم هارداسان گل
من خطا ائتدیم یانیب هیجراندا هر گون پاک اولوندوم
دای قوتاردی یار جزای ایشتیباهیم هارداسان گل
شاعیر : وحید شکرزاده
