عليرضا ذيحق
قرآن ناغيل لاري :
يوسف و زليخانين داستاني
آللاهين اَن گؤزل ياراتديق لاريندان بيري " يوسف " ايدي كي دونيانين بوتون گؤيچك ليك لري بير طرفه اودا بير طرفه . يوسف ين جمالي آي اولدوز كيمي پارلاق و گونش تك ايشيقلي ايدي و اونو گؤرَن هر بير اينسان ، تانري نين گوجونه حئيران قالاراق مقدس و معنوي دويغولارا داليردي . بو اوزدن ده آتاسي حضرت يعقوب، يوسفي او قَدَر سئويردي كي باشقا ائولاد لاريندان تكجه " لاوي " ني چيخديق دان سونرا ، هاميسي اونون حسادتيندن آز قالا اؤلوردولر . " بنيامين " ده كي يوسف ين اؤز دوغما دولاما قارداشي ايدي و هر ايكسي نين ده آناسي " راحيل " ايدي او زامانلار هله ديل آچماميش بير اوشاق ايدي.
يوسف ين دوققوز ياشي واريدي كي بير گون درين اويقويا گئديب عجيب بير يوخو گؤره ر كن آييلديقدا ، آتاسينا بئله دئيير :
" رويا عالَمينده گؤردوم كي گونش و آي ايله بير ليك ده اون بير اولدوز منه سجده قيلير!"
يعقوب بونو ائشيتديك ده اؤز گؤردويو يوخودا يادينا دوشوب يوسفه تاپشيردي كي روياسين دان كيمسه يه سؤز آچمايا . يعقوب يوخودا گؤرموشدو كي ييرتيجي و آج قوردلار يوسفي ديديب داغيتماق ايسته ركن يئر قارين آچيب اونو اوداراق اوچ گون سونرا جان قورتاريري و قارانليق لارلا چولقالانان يئر و گؤي بير لحظه ايشيقلانيري.
بير ايل سونرا يدي كي يوسف ين اؤگئي قارداشلاري اَل بير اولوب حسد دن پاتلاياراق يوسف ي گزديريب دولاشديرماق باهاناسي له آتا لارين دان قيسا بير سفر اوچون ايذين آليب اونو ياشاديقلاري كنعان تورپاق لاريندان اوزاق لاشدير ديلار . ايلك آنلاردا يوسفي اَزديريب ديله توتسالاردا ، گؤزلردن گيزلي خلوت بير يئرده ايدي كي قارداشلاريندان بيري خنجر چكيب يوسف ين باغريني پئيله مك ايسته ركن ، " لاوي " بو ايشه مانع اولاراق آرالاريندا بؤيوك تارتيشما چيخدي. سونون دا يوسفي اؤلدورمك دن واز كئچيب اونو بير قويويا آتديلار . او فيكر ايله كي قويودان هئچ واخت جان قورتارانماز ، اونون كؤينه ييني ده بير گئچي قاني له بولاشديريب آغلار گؤزلر له اؤزلريني حضرت يعقوبا يئتيره ركن دئديلر :
" نه قَدَر جان آتديق كي بلكه يوسفي قورتاراق ، اولمادي و قوردلار اونو ديديب پارچالاركن تكجه بو قانلي ديديلميش كؤينه يي بيزه قالدي. "
حضرت يعقوب كؤينه يه باخديقدا گؤز ياشلاري قانلا قاريشاراق بو آنلاردا تكجه ائشيتدي يي آند ايله قسم ايدي كي اوغول لاري ايچيرديلر .
يعقوب يوخودا گؤردويو كئچميش روياسيني دوشونه رك سوسوب دينمه سه ده يوسف ين فراقيندا اوقَدَر آغلادي كي گؤزلري نوردان دوشدي .
يوسف كي قويونون تركين ده يدي تكجه پناهي بيرجه تانري ني يادي سالماق وآللاها يالواريب قورتولماسي ايدي . ساعاتلار كئچديكجه آج ليق و قورخو اونو جايناقلارينا آلاراق سحر اولجاق بير كروانين آياق سس لريني دويدي. سونرا گؤردو قويونون آغزين دان داشي قيراغا وئرمك له بير سَتيل ساللاديلار . يوسف آياقلاريني او سَتيلين ايچينه قويوب كندير دن ياپيشاراق ، سَتيلين آغير لاشماسي سو ايله دولماغيني خاطيرلاديب اونو چكديلر ديشاري . آمما كروان اهلي سو عوضي بير اوغلان اوشاقي گؤردولر كي معصوميت و گؤزل لي يي له هامي نين محبتّيني قازانماغا چاليشيردي. اوكروان كي ميصره ساري گئديب يوكو بوتون كنيز و غلام ايدي كي قول لار بازاريندا اونلاري حراج ائتسين لر يوسفي ده گئيين ديريب قارنين دويوراراق اؤزلري نن ميصره آپارديلار .
يوسف ين گؤزل لي يي ميصر ده ديل لر و ديش لر ازبري اولاركن ، شؤهرتي ميصرين حؤكمداري " عزيز " ين قولاغينا چاتدي . ميصر ين عزيزي كي ائولاد سيز ليق آجي سي ياشاييردي يوسفي گؤرجك بوتون كؤنول له اونون تعليمي اوچون و دوزگون تربيت اولماغينا خاطير ده هر نه اَلين دن گليردي ائتدي . آنجاق يوسف ياشا بويا دولونجا سارايين ملكه سي عزيزين آروادي " زليخا " اونون عاشيقي اولور و يوسفي گؤرمه يينجه اوره يينده بير آن قرار و آراميش اولمور. زليخا كي گؤزل ليك ده بوتون ميصرده مَثَل ايدي هر نئيله دي بير آن اولورسادا ، يوسف اونون عشقيني حتتا بير باخيش ايله ده قارشيلامادي . زليخا كي فرصت داليجا ايدي تا يوسف دن كام آلسين بير گون يوسفي تك لر كن ، اوتاقيندا نيياييش ائتدي يي بير بُت ون اوزونه ايپك پارچا سالاراق ايسته دي كي يوسفي باغرينا آلاركن ، او بُت بو چير كين ايشين شاهيدي اولمايا .
يوسف بو آن دا زليخا نين قلبيندن كئچه ني آنلاركن دئدي :
" سن بير داش دان كي نه گؤرمه يه گؤزو وار نه ائشيت مه يه قولاغي ، بو قَدَر اوتانينجا، من نه جور اؤز آللاهيم دان كي بير لي يه له هر بير زادا جانلي حالدا شاهيد دي حيا ائله مي ييم . "
يوسف سارايين چيخيش يولونو آراركن زليخا كي شهوت آلوولاري ايچينده توتوشوب يانيردي بو ايشه مانع اولاراق اَل آتدي يوسف ين كؤينه يينه كي كؤينك آرخادان جيريلاراق بو آن دا ميصرين عزيزي قصره گيردي . زليخا زيرك ليك له دايانمادان مكير ايشله ييب اَري عزيزه بئله دئدي :
" سنين ناموسونا اَل آتان بيري، كيمسه اولورسا گرك باغيشلانماييب وجزاسينا يئتيره !"
يوسف كي بو آن دا دانيشماغا بير سؤزي يوخ ايدي قلبي نه تانري نين ايلهامي بير ايشيق كيمي آخاراق ديلين دن بو سؤزلر قوپدي :
" ايشين گرچه ييني بئشيك ده كي هر قونداق لي دان سوروشسانيز، اينانين كي او بَبَك ديله گليب حقيقتي آنلادا بيله ر . "
ميصرين عزيزي بئشيك ده كي بير كؤرپه اوشاغين سارايا گتيريلمه سين ايسته دي و باشلادي اونو سورغويا چكمه يه . او سوت اَمَر اوشاق دا ديله گليب دئدي :
" يوسف ين كؤينه يي ائله گؤرسه دير گوناه كيم ده دي !"
يوسف ين كؤينه يينه باخديقدا گؤردولر آرخادان سؤكولوب اوزولوب دي و ميصرين عزيزي هر زادي آنلاركن زليخايا دئدي :
" ندن دير كي سيز قادين لارين مكري ، هميشه بؤيوك ، عقله سيغماز و حئيرت لي دي ؟ "
سونرا اوزونو يوسفه توتوب دئدي :
" زليخانين گوناهيندان گئچ كي اودا بلكه توبه ائله يه !"
زليخانين يوسفه وورغون لوغو ديللر ازبري اولاراق او قادين لار كي يوسفي گؤرمه ميشديلر باشلاديلار اونو قيناماغا كي زليخا قصرده بؤيوك بير ضيافت وئريب بوتون حيشمت وجلال لا ياشايان قادين لاري دؤوره سينه ييغيب هره نين اَلينه بير بيچاق لا ناريش وئردي و هئچ نه دئمه دن غَفيل دن يوسفي مجليسه چاغيردي. قادين لارين گؤزو يوسف جمالينا ساتاشاراق هاميسي اَل لريني كسه رك اوس باشلاريني قانا بولاديلار .
زليخا آمما يوسفي جان دان سئوه رسه ده سينميش غورورو، اونون قلبي ني كينه لر له دولدوروب بير گون ميصرين عزيزين مجبور ائدير كي يوسفي زيندانا سالا .
يوسف زيندانا دوشدوك ده فرعونون ايكي نفر غلام لاريندان دا حبس ده يديلر .بيري عزيزين ساقي سي ايدي بيري ده چؤره ك چي سي . آيلار اؤتوب ايللر كئچه رك بير گئجه هر ايكيسي ده يوخو گؤرورلر . اونلار يوخولاريني يوسفه آچيب دييه رك يوسف اونلارين رويالارين بئله تعبير ائله يير :
" اوكي يوخودا گؤروب اوزوم اَزير و اونون شيره سين چكير، تئزليك له زيندان دان چيخاراق گئچميش ده كي شان شؤهرَتيني بير ده تاپاجاق دير . آمما اوكي يوخودا گؤروب دي باشينا چؤره ك قالاراق ائوه يئتيرينجه قوشلار تؤكولوب او چؤره ك ليري يئيير لر، چوخ چكمه دن چارميخا چكيليب جانين ال دن وئره جك دير. "
يوسف ين دئدي يي كيمي ده اولدو آمما يوسف بير لحظه تانري نين اونا اولان مرحمتي ني اونوداراق ساقي آزاد اولاراق دئدي :
" مني ده بير فرعونون يادينا سالارسان !"
بو سؤزه خاطير تانري غضب ائله ييب يوسف ين زيندان گونلريني داها اوزادير تاكي بير گون ميصرين عزيزي بير يوخو گؤرور. او روياسيندا نيل چايي نين گؤزل ليك لرينه باخديقي آندا ، يئددي آريق اينك گؤرور كي اوزون ايتي ديش لر و توك سوز بدن لر له سودان ديشاري چيخيب يئددي شيشمان و سود لي جاميشي ديديب پارچالير لار. هابئله بير ريشه دن چيخميش يئددي ياشيل سونبول ايله يئددي سولغون و قوروموش سونبول گؤرور كي قورو سونبول لر اود توتاراق بوتون يئر گؤ يي يانديريب ياخير لار.
يوخوسونو كيمسه تعبير ائده نمه دن ، او ساقي بير دن بيره يوسف ين يادينا دوشور و فرعونا دئيير :
" رويالاري تعبير ائتمك ده كيمسه يوسف جه باشاريلي اولا بيلمَز. "
فرعون يوسفي زيندان دان چيخارتديريب قصره چاغيراراق يو خوسونو يو سفه تعريف لير . يوسف ده جواب دا بئله دئيير :
"قارشي دا يئددي ايل بوللوق واردي و يئددي ايل ده قيت ليق . قيت ليق ايل لرين ده بير داملاياغيش دا ياغماياجاق . او ايل لرده نه اكين اولاجاق ، نه باغلاردا ميوه و نه يئرده ياماج دا اوت و گؤيَرَنتي. بو يئددي ايلي هرنه اكير سيز بيچير سيز اؤزگه اؤلكه لره ساتمادان تاخيل لاريني آنبارلاردا ييغيب ساخلايين كي قيت ليق ايللر اوچون ذخيره اولسون .حتتا باشقا اؤلكه لردن آليب انبار ائله مك له او ايل لرده خلقي آجليق دان قورتارين !"
يوسف ين بو گؤستَريشي و فرعونون اونا اولدوغو محبت و سئوگي سي ، باعيث اولدي كي يوسف زيندان دان قورتولدي و ميصرين بوتون خزانه لري و آنبار لاري اونا تاپشيريلدي تا بو قورخونج دوروم اوچون بوتون بيليك لريني ايشه آپارسين .
زليخادا آچيق آيدين اؤز گوناهيني و عشقيني بوينونا آلاراق، يوسف ين پاك اولدوغونو خاطير لادي ودئدي :
" من اؤز نَفْسيمي تقصير كار گؤروب يوسفه هله ده عاشيق اولدوغومو آنلاديرام . او هئچ واخت بير گوناه ايشله ميشدي."
آيلار ايللر كئچيب گئده رك ميصرين عزيزي اؤلوري و پادشاهليق يو سفه يئتيرديك ده قيت ليق ايللري ده باشلانير .
چوخلي اؤلكه لرده قيت ليق اولدوغو كيمي كنعان دا ايسه قوراقليق اولوري و آرپا بوغدا تاپيلمادان ، آجليق و حشتي اوراني دا گؤتوروري. حضرت يعقوب " بنيامين " دن باشقا او بيري اوغلانلاريني ميصره يوللايير تا كروانلا گئديب اوردان تاخيل آلسين لار. يو سف ين قارداش لاري اونو تانيماسالاردا يوسف اونلاري تانير . آنجاق هئچ بير تانيش ليق وئرمه دن اوست اؤرتولو حالدا اونلارين يئر يوردونو سوروشوب آتاسي يعقوب و قارداشي بنيامين دن ده خبر توتوري . يوسف ين اَمري نن مأمور لار اونلارين يوك ياپيني آرپا بوغدا نان قالاياراق اون سگگيز گونلوك بير يولو گئري ده قويوب كنعانا چاتير لار. دوه لرين يوكونو آچيب بوشالتديقدا گؤرورلر كي اونلارين وئرديك لري بوتون قيزيل گوموش لري ده قايتاريب لار.
بير سوره سونرا كنعان دا آذوقه قورتولاراق يئنه ميصره گئتمك مجبوريتينده ايديلر كي يولا دوشمه دن حضرت يعقوب ون ائولادلاري دئيير لر:
" ميصرين پاديشاهي بيزدن ايسته ييب كي بير داها گئنه اورا گئديرسك ،بنياميني ده اؤزوموز له آپاراق .بو ايش ده نه سير وارسا بيز كي آنلاميريق .آمما يقين كي بنياميني آپارماساق پادشاه اوچون بؤيوك بير توهين ساييلاجاق ."
حضرت يعقوب كي يوسف ين قضا قَدَري اونو ن گؤزلريني نوردان سالميشدي حوزون لو حالدا دئدي :
" يوسفي قوردا وئرديك دن سونرا ، سيزه بير داها اينانجيم قالماييب دي . "
اونلار يالوار ياخار و التماس ائده رك بنيامين آياقيني ايره لي قويوب آتاسيندان ايذين ايسته دي كي خلقه آذوقه يئتيرمك اوچون اولورسادا ، بو سفر رضايت وئرسين .
حضرت يعقوب تانري يا توكّل ائده رك بوتون ائولاد لاريني بؤيوك بير كروانلا يولا سالدي.
يوسف دوغما قارداشي بنياميني گؤره رك اونو ديله توتوب دئدي :
" ائولي مي سن يا سوباي ؟ "
_ " ائولي يم و اوچ اوغلوم وار. بيري نين آدي قورددور بيري ايسه قان، اوبيري ده كؤينه ك . يوسف قارداشيمين خاطيره سيني ديري ساخلاماق اوچون بو آدلاري اونلارا قويموشام .آخي من هله ديل آچماميشديم كي يوسف آدلي بير قارداشيمي قورد يئميشدي ! "
يوسف بو سؤزلري ائشيدجك گؤزلري ياشاردي و اؤزونو تانيتديراراق آتاسي يعقوب ون احواليني سوروشدو :
" آللاهين مرحمتي نن اؤلوم دن قورتولاركن گؤردويون كيمي ساغليغيم يئرينده دي. آنجاق گؤيلوم ايستير كي اونلار گئتسه لرده سن قالاسان تا بيرگون بير ليك ده آتاميز حضرت يعقوبون گؤروشونه گئده ك . بو ايش اوچون بير فيكريم وار كي سنه دييه جه يَم . "
بنيامين دئدي :
" قارداش لاريميز آتاميزا سؤز وئريب لر كي من سيز قاييتمايالار . اگر آتام مني گؤرمه يه و سسيمي دويمايا يقين بيل كي مومكون دي باشينا بير بلا گله !"
يوسف آمما اؤز بيلدي ييني ائله دي و قارداشلاري نين كرواني يولا دوشه رك بير قيزيل تاسي كي بوغدا پيمانه سي ايدي " بنيامين " ين اشيالاري ايچره گيزلت دي. كروان يولا دوشه رك مأمورلار او تاسي بنيامين ين يوكون دن چيخاراراق توتوقلو حالدا اونوقصره آپارديلار . يعقوب ون ائولاد لاري نه قَدَر التماس ائتدي لر كي بيزيم هامي ميزي توتوقلايين آمما تكجه بنياميني آزاد ائدين هئچ نتيجه وئر مه دي . آنجاق يوسف ،ميصرين عزيزي اولاراق آتاسينا بو مضموندا بير مكتوب يازدي :
" بنيامين ين اوغورلوق تؤهمتي اوزره گوناهي اورتايا چيخينجا قصرده ساغ و ساليم ياشاركن سوچو اولماز سا اونا هئچ بير ضرر توخونموياجاق دير !"
حضرت يعقوب دا او مكتوبون جوابيندا بئله بير نامه يازديراراق آلتيني مؤهور له دي و وئردي قاصيده كي تئزليك له ميصره يئتيره :
" آللاهين مهربان و باغيشلايان آديله . بو نامه يعقوب دان دير كي اسحاقين اوغلودور و ابراهيمين نوه سي . جدّيم ابراهيم ، نمرودون اَلي ايله اودا آتيلدي آمما آللاهين لوطفو جهنمي اونا گولوستان ائتدي . بيل مه لي سن كي بيز لر ائله بير سوي دانيق كي بو تؤهمت لر بيزه ياراشماز. ائولاديم بنياميني منه قايتاركي يوسف ين فراقي منه بس دير... "
يوسف آتاسي نين مكتوبونو گؤردوك ده كدر له نَرَك كؤينه ييني چيخاريب وئردي قصرين قاصيدينه و دئدي :
" آتيني وار گوجونله قوووب بو كؤينه يي حضرت يعقوبا يئتير و بنيامين ين گوناه سيز اولدوغونو سؤيله . هابئله حضرت يعقوب و ائولادلاريني ميصرين قصرينه قوناق چاغير . "
حضرت يعقوب ميصرين فرعوني يوللايان بوخچاني آچاراق ، يوسف ين اييي فضاني بورودو و كؤينه يي اؤپوپ گؤزلري اوسته قوياراق ، گؤزلري نورلا دولدي وقارانليق گؤردويو دونيا بير داها بيله سينه ايشيقلاندي. حضرت يعقوب بيلدي كي يوسف ديري دي و ايندي ميصرين عزيزي اولاراق بنياميني ده مصلحت اوزره اوردا ساخلاييب .
يعقوب بوتون عائيله سي له يولا چيخيب ميصرين سارايينا چاتديقدا يوسف ين باشيندا شاهليق تاجي گؤروب هامي ليق لا اونا حؤرمت ائده رك يوسف بير يانليش ليق ياپاراق آتاسي حضرت يعقوب ون آياغينا دورمادي . بورادايدي كي يوسف اوشاقليق دا گؤردويو يوخونو يادا ساليب اؤز عائيله سي له گؤروشه رك بوتون ميصرده شن ليك ضيافتي وئريلدي .
آمما حضرت يوسف دن بؤيوك بير سعادت اسير گندي و اودا بوكي جبرئيل يوسفه نازيل اولوب اوننان ايسته دي اووجونو يوموب آچسين . يوسف بو ايشي گؤرجك ايشيل – ايشيل پارلاق بير نور گؤردو كي بارماق لاري آراسيندان شعله چكه رك بير گؤز قيرپيميندا گؤي اوزه رينه گؤتورلن دي .
يوسف بو ايشين سَبَبيني سوروشاركن جبرئيل دئدي :
" او نبوّت نوري ايدي كي بير يول زيندان دا آللاها توكل ائتمه دن و ساقي يه ائتدي يين رَجادن اؤتور و بير ده آتان حضرت يعقوب ون احترامينا آياغا دورماماغين اوچون سن دن آليندي و قارداشين " لاوي " نين ووجودوندا قرار تاپاجاق دير ."
بئله ليك له اولو تانري " لاوي " ني اؤز مرحمت لري له مقدس لش ديره رك بوتون بني اسرائيل پيغمبر لري و موسي اونون سويون دان ساييلير لار .
آنجاق آللاه تعالانين يوسفه اولدوغو محبت يئنه ده اسكيلمه دي . اوراجان كي حتتا يوسف بير گون زليخاني پوزقون ، يورقون و سولغون حالدا گؤره رك اونا دئدي :
" بو عشق آتشي ندير هله من آنلاميرام ! امما بيل كي نه چكيرسن ائتدي يين معصيته خاطير دير . "
زليخا بو سؤزدن اوزوله رك چوخ قوصصه لي حالدا دئدي :
" بير گوناه وارسادا او گوناه عشقين گوناهي دير نه منيم . سنين سئوگيين اوزره دير كي بير عؤموردي يانيب ياخيليرام و او اوزدن ده جوان ليغيمي بو تئزليك ده ايتيرميش اولموشام . عشق اگر گوناه ايميش سن دييه ن و من ده اينانان بيرجه تانري ندن اينسانلار دويغوسوندا اونا بئله بير بؤيوك يئر وئريب دير. من گوناه مُبتَلاسي يوخ بلكه عشق مبتلا سي يام . اگر من نَفسي مين اسيري اولسايديم باشقا بير يوللارلا او آتشي سؤندوره رديم ! نييه كي هله بيلمه دي يين بير سيروار اودا بو كي ميصرين عزيزين ده ،او كي هئچ يوخ ايدي كيشي ليك و جينسئل ليك قابيليّتي ايدي .من اونا بير قادين يوخ بلكه بير كوله ايديم و بو گونه جان حقيقتي گيزلت مك زوروندايديم . آمما سنه اولان عشقيمه خاطير، هله ده بو گونه جان باكيره ليغيم يئرين ده دير . عشقي آنلاماق چوخ چتين دير و سئومك ، تكجه بير جينسئل دويغو دئييل كي اونون اوزون دن، عاشيق لر مذمّت اولونا . عشق ، يانيب توتوشماق و واله اولوب دويغولارلا تك باشينا ياشاماق كيمي بير زاد دير. عشق ، شايد ده بير افسون دور و سؤزصؤحبتي اونو باشا دوشمه ين لر اوچون بير اويدورما ناغيل.عشقي بيلمه ك اوچون عاشيق اولماق لازيم دير . "
يو سف درين دن دوشونه رك زليخايا دئدي :
" من دن ايسته يين ندير ؟ "
" سنين عشقين اوزره تالان اولموش عؤمرومو ن گئري دؤنمه سين ايستيره م ."
يوسف اوزونو تانري يا توتاراق بوتون ايماني له تانري يا دوعا ائده رك عشقين نه اولدوسونو باشا دوشمه ك و زليخانين يئني دن جوان لاشماغين ايسته دي .
آللاه تعالا يوسف ين جانينا عشق قيغيلجيم لاريني سالاراق ، بير آن اولورسادا حيسّ ائتدي كي زليخاني گؤرمه دن حياتي مومكون دئييلي وبو اوزدن ائله حيس ائتدي يي عشق ايله، دؤنوب زليخايا باخاركن اونو ن بير داها جوان لاشماسين گؤروب اونونلا ائولنمك قرارينا گلدي .
يوسف فاني دونيايا گؤز يوماركن بوتون ميصر ائل لري اونون مطهر جيسمي نين هاردا قويلانماسي اوچون تارتيشاراق نهايتده قرار بو اولدو كي مرمر داش دان بير تابوت دوزه لسين و اونو نيل چايي نين اَن درين ليك لرينده دفن ائتسين لر . تا بئله ليك له اونون مقدس ووجودونون بركتي بوتون تورپاق لارين محصولونو آرتيرا و تانري نين اونا اولان محبتي بير كؤلگه كيمي ابديّته قَدَر،
نيل چايي نين اطرافيندا ياشايان ائل لرين باشي اوستونده اولا.نييه كي او گونه جان هئچ بير پاديشاه ، يوسف قَدَر آراميشه ، باريشا ، اينسانليقا و اينسانلارين سعادتينه قييمت وئرمه ميشدير.
دانلود : متن pdf قرآن ناغيل لاري : يوسف و زليخانين داستاني
