دوزلی اوغلان آذربایجانی تورکی شعر موزیک

 قرآن ناغيل لاري

 حضرت عيسي نين داستاني

آللاه تعالا " عمران " اوچون نيدا ائتديك ده كي تئز ليك ده بير ائولادين اولاجاق دي او  و خانيمي " حنّه" سئوينه رك نذر ائتدي لر كي اونو " بيت المقدس " ين خاديمي اولاراق بؤيودوب يئتيشديره لر . آنجاق اونلار بير اوغلان اوشاقي گؤزله ركن تانري اونلارا " مريم " آدلي بير قيز وئرير. آمما يئنه ايلقار لاريني اونوتمادان هم مه شه مريمي بيت المقدس ده عيبادت محرابينداتانري يا دوعا ائتمه يه تشويق ائديرلر. مريم ، گنج ليك ايل لرينه چاتديقدا  پاك ليق دا و معصوميت ده ديللر ازبري ايدي و اوندا اولان زهد و تقوا دا كيمسه نين شوبهه سي يوخ ايدي . بير گون محراب دا بيرجه تانري يا شوكر ائديب اونون دونيا دا تكجه ياشاييش وبركت قايناقي اولدوغونو خاطير لاياراق ، آللاهين اَن مقدّس ساييلان ملاكه سي جبرئيل ، بير اينسان شكلينده مريم ين گؤزونه گؤروشوب دئيير :

" من آللاهين ائلچي سي اولاراق بير موشتولوق لا گلمي شَم و اودا بو كي سن چوخ چكمه دن بير اوغول صاحيبي اولاجاقسان كي ايندي يه جان دونيادا هئچ كيمين آللاه يانيندا او قَدَر عيزَّتي اولماييب دير ."

مريم توماراق دئدي :

" نئجه اولارمي كي بير باكِره دوغا بيله ؟ اودا من كي عؤمروم عيبادت ده و رياضت ده كئچه رك هئچ بير گوناه ايشله مه ميشَم و خياليم دا، هم مه شه تانري عشقي وار ايدي !"

جبرئيل" بؤيوك تانري هر ايشه قاديردي و سن نوطفه سيز بو آن دا حاميله اولوب صاباح سحر دوغاجاق سان !" دييه مريم دن ايسته دي كي صوبح اولمادان هامي نين تانيديقي هوندور بير قورو خورما آغاجي نين يانينا گئده .

" مريم " ين حاميله لي يي هاميسي دوققوز ساعات چكدي و بيت المقدس ين گون چيخان سَمتين ده اولان قورو خورما آغاجي آلتيندا ، اونو دوغوم سانجي سي توتوب عيسا ني دونيا يا گتيردي . مريم عائيله سي نه و بني اسرائيل خلقي نه، نه جاواب وئره جه يينه قالاراق ،عيسا ديله گليب دئدي :

" هئچ نه غم يئمه آنا ! تانري او قَدَر مهربان دير كي سني  هئچ بير آن دا تك قويماياجاق . آللاه تعالا بو معجزه ني باشارير سا سني قُوروماقي دا باشارير . دايانديقين سولموش آغاجا بير آن باخارسان اونو او قَدَر ميوه لي و يارپاق لي گؤره جك سن كي ايندي يه جان بو اؤلكه ده او جور بير بركت لي آغاج گؤرونمه ييب دير . آياقي نين آلتيين دان دا بير بولاغ جوشاجاق كي چاي اولوب آخاجاق دي. "

مريم بير آن باش قالديرديق دا ، يام ياشيل و ميوه لي بير آغاج گؤردو و يئره باخديقدا داشقين بير بولاغ . مريم اؤزونو بولاغ دا تطهير ائديب عيسا ني قونداق لادي و يولا دوشه رك عيسا دئدي :

" كيمسه سن دن سوروشور سا بو اوشاق كيم دن دي هئچ نه دانيشما و سؤيله كي اؤزون دن سوروشساز دييه ر ."

مريم ، عيبادت محرابينا قاييداركن اونون قوجاغيندا يئني جه دوغولموش بير اوشاق گؤره ركن ، بني اسرائيل  خلقي اونا آغيز تورشاديب تؤهمت و بؤهتان لار ياغديرارق دئدي :

" اونو من دوغموشام. آمما اوشاقين اؤزودي كي سيزه دييه جه ك كيم دي و گرچك لر نَدي. "

تانري نين امريله عيسا بئشيك ده ديله گليب دئدي :

" من تانري نين بنده سي يم كي آللاه تعالا منه " انجيل " كيتابيني باغيشلاياراق سيزين پيغمبريز اولاجاغام ."

خلق سوت اَمَر بير اوشاقين دانيشماسيني گؤردوك ده تانري يا سجده ائديب سوسوب دينمه دن مريم ين مقدس لي يي هر يئره ياييلدي و عيسا نين دوغوشو ايله بيرگه او قورو آغاجين يئني دن جان تاپيپ گؤيه رمه سي و اوردان بير بولاغين جوشماسي ، ديل لر ازبري اولدي.

عيسا اَته جانا گليب عادّي بير اينسان كيمي بؤيويه رك اَن بالاجا ياش لارين دان خلقي دوزيولا چاغيريب آللاه تعالا نين بويور دوقلاريني اعلان ائديردي. سونرا لار حضرت عيسا ائل اوباني گزه رك هاردا بير دردلي اينسان وارايدي اونا يارديم گؤسترمه يه چاليشيردي . عيسا نين اون ايكي جان يولداشي وار ايدي كي اونلار حوّاري آدلاناراق عيسانين رسالتينه ايمان گتيره رك بير آن اولورسادا اوننان آيريلمازديلار. مگر كي عيسا نين بويوردوغو بير مصلحت اوزره بير ايش داليجا گئده لر.

جماعت عيسا دان معجزه لر ديله ركن لاپ چتين آنلاردا كي گرك بير معجزه گؤستره ردي اؤلو لري ديريلديب خسته لره شفا وئريردي.

او يهودي لرين دين ده قويدوقلاري بدعت لري اؤز موعيظه لري نن سينديرماغا چاليشاراق ، بير پارا منفعت جيل يهودي لر كي ديني اؤزلرينه چؤره ك آغاجي ائديب اولمايان ظولمي خلقين حاققيندا ائديرديلر ، عيسا نان دوشمن چي لي يه قالخيب اونو آزار اذيت ائتمه يه چاليشير ديلار.

عيسادان سوروشاراق كي سن بو معجزه لره صاحيب اولاركن نييه اؤزون هم مه شه يوخسول لوق و چتين ليك چكير سن دئييردي :

" منجه دونيانين اَن بؤيوك لذّتي ، معنويت ده دير و معنويت ايسه تانري ني ياد ائتمك ده ، خلقين دردين غمين ياخين دان گؤروب اونلارين آجيلاريني پايلاشماق دادير كي من ده بو يولون يولچوسويام . منيم قوللوق چو م اَل لريم دير و آتيم كاليسكام آياقلاريم .  دؤشه ييم تورپاق دير و ياستيغيم داش . گئجه لري چيراغيم آي اولدوز دور و اَن يئمه لي خوروشتوم آج ليق . ائويم ده ،جان ائوي دير كي دولودور تانري نين قورخوسونان كي هر لحظه اونون عظَمتيني داها آرتيق دوشوندوك ده بو دهشت داها آرتير. پالتار لاريم كئچه دن دير و گئجه ني ياتديقدا ، تانري نين محبّتين دن باشقا بير دوشونجه م يوخدور. بونلار لا بئله من دونيادا ، اؤزوم دن چوخ، هئچ بير زنگين و خوشبخت آدام تانيميرام ."

عيسا دان سوروشورلار نه اوزدن ائولن مير سن كي دئيير :

" اينسانلاري ناشوكور گؤردوك ده بو ايش دن واز گئچيره م. نييه كي اگر ائولاد صاحيبي اولورسام و او ديري قاليب بوي بوخون آتيرسا ، باشلاياجاق باشقالاري تك يئر اوزونده فيتنه ائتمه يه و اگر اؤلورسه ده عؤمرومون سونوناجان گرك دير غمه و ماتمه دالام . بونلار لا بئله يئنه منيم ايختيياريم تانري دا دير و او بيله ن هر زاد دان ياخشي دير. "

حضرت عيسا 33 ايل ياشاياراق بركت لي عؤمرونون اَن چوخونو تانري نين وحي ائتدي يي " انجيل " ين قوتسال آيه لريني خلقه آچيقلاماقلا كئچير تسه ده جماعته ايبليسين شررين دن دانيشيب اونلاري قوروماغا چاليشير دي.

حضرت عيسا كور لارين گؤزونو آچيب جوذام توتموش آداملارا شفا وئرمك له ، گونو گون دن عمل لري نن و سؤزلري نن خلق ايچره نوفوذو نو آرتيرير دي. بو اوزدن ده او يهودي لر كي منفعت لريني خطرده گؤروردولر چئشيد لي توطئه لره باشلايير ديلار . عيسا بئله نكي آداملار لا راسلاشاركن دئييردي :

" من تانري نين ايذني له اؤلولري ديريتديم ، كورلارا شفا وئرديم و چوخلي خسته ليك لره غلبه ائتديم آمما هئچ واخت ائده بيلمه ديم بعضي اينسانلارين حماقتيني كي دونياني فقط حسادت ده، نيفرتده وپول دا پارادا آرايير ديلار ايصلاح ائده م . دونيا بير بَزَك لي عجوزه دير كي مين لر قيليقا گيريب هر گله نين گليني اولاراق آخيردا هاميني اؤلدوروب دي. اوننان سوروشساز كي ايندي يه جان نئچه اَره گئديب دي حتتا سايي دا اَلين ده يوخ ايدي. واي اونلارين حالينا كي ياشايير لار و دونيانين عاشيقي اولاراق يئنه اوننان وفا اومور لار. "

او گئجه كي قرار ايدي عيسا صاباحي اؤز خاچيني داشي ياراق صليب اوسته جان وئره ، حوّاري لرينه دئيير :

"صاباح من گؤي لره عروج ائديب يئر اوزون دن آيريلاجاغام . آنجاق اونون كي ايماني چوخ دور و تانري نين شَفَقَتينه اوره ك دن اينانيب اؤز ريضاسي نان ائله يه بيله ر منيم سيمام دا خاچا ميخلانا ."

بوتون حوّاري لر بو ايش اوچون حاضير آماده اولاراق ، عيسا بيريني سئچه ركن دئدي :

" بو جمع ده سيز لردن بيري كي هاميدان چوخ راضي ايدي صليبه چكيله ، سحر اولجاق مني هاميدان تئز داناجاق !"

عيسا او سون گئجه ، آخير شامي حوّاري لر له يييه رك اونلارين گؤزلري اؤنون ده گؤيه يوكسه له رك سمايه عُروج ائتدي.

صاباحكي گون همان حوّاري كي هم اؤز آرزوسو ايدي و هم تانري نين ايسته يي ايدي ، چئهره سي و قييافَتي عيسا شكلينه دوشوب دوشمن لر اَلين ده صليب ده جان وئردي.

بئله ليك له عيسا اؤلمه دن اوّل گؤي لره يوكسه لدي و مسيح آدي مقدس بير كلمه اولدي تانري يا ايماني اولوب اونو سيتاييش ائده ن لره . حوّاري لر عيسا ني گؤي اوزره گؤزدن ايتيرمه دن ، اونون نورلا غرق اولموش پَشمينه پالتار لارين گؤردو لر كي وار گوج ايله يئره دوشدو . نييه كي گرك ايدي ملكوت دا كيمسه نين اَي نين ده، دونيا زينتي اولمايا يدي. 

	قرآن ناغيل لاري : حضرت عيسي نين داستاني
	عليرضا ذيحق
	105 KB
	PDF
	آذري توركجه
	آذري عرب اليفباسي