مثنوی مولوی تورکی دیلینده ابیات 247 تا 300
باققالينان طوطينين ناغيلي و طوطينين دوكاندا ياغ جالاماسي
واريدي بير باققالين بير طوطي سي
آخ نه طوطي يام ياشيل جان طوطي سي
سؤيله ير آل وئرچيلر چين نوكته لر
دوكاني گودمكده باققالدان بتر
قوش ديلينده يوخ اونا تاي بير بديل
دانيشار اينسانيلن او ديل به ديل
٢٥٠ بير گون او دوكان آرا آچماقدا پر
دگدي، سيندي ياغلا دولموش شيشه لر
يوخ خبردن خبري، شن، آرخايين
خواجه گلدي تاپدي دوكاندا يئرين
ياغلي گؤردو هر ياني سالدي كولك
ووردو باشدان طوطي سي ائتدي تولك
بير نئچه گون سوسدو طوطي اولدو لال
خواجه چكدي اودلو آهلار دال به دال
ساققالين يولدو دئدي گؤردون نئجه
قاره لندي گوندوزوم اولدو گئجه؟
٢٥٥ چاپيلايدي كاش بيلكدن اللريم
باشيني داز گؤرمه يئيدي گؤزلريم
هاردا بير درويشه وئردي هديه لر
قوش دانيشماقلا اوزو اولسون گولر
اوو كاياردي ايش باشيندا ال، الي
اوچ گئجه گوندوز دولاندي غوصه لی
مين كلك قوردو دانيشسين طوطي سي
اود آليب قوو تك آليش سين طوطي سي
بير باشي داز جولَقي گلدي قاباق
لوت باشي ترسه تييانچا، داز قاباق
٢٦٠ طوطي بيردن نوطقه گلدي آچدي ديل
سؤيله دي درويشه اي من تك ذليل
نه گوناه ائتدين كي اولدون داز قاباق
جالادين ياغ يوخسا سنده من ساياق
دلقه چولقانميش كيمي گؤردو اؤزون
گولدوروب اوخشاتماسيندان خالق او زون
فرقي يوخدور يازمادا شئرله شيرين
اؤزونه اوخشاتما گل پاكلار ايشين
بو سبب دن دوشدو حقدن، دونيا يان
اولمادي ايبدال حق خالقا عيان
٢٦٥ انبيايه سانديلار تاي اؤزلرين
اولييا تك گؤردولر آي اؤزلرين
دئديلر ياتماق، يئمك دير درديميز
بيز بشر، اونلار بشر يوخ فرقيميز
آرادا آيرينتي وار هاردان هارا
ليك كورلوق هاردادير قانماق هارا
يئديلر ايكي آري بير شيره دن
بيري زهر اولدو بيري شيره ندن
هر ايكي آهو بير اوتدان اوتلادي
بيريسي موشك اولدو، ديگر قيغلادي
٢٧٠ ايچديلر بير چشمه دن نئيلر سويو
بو شكردير آيريسي بوم بوش بورو
يئتميش ايلليك فاصيله وار اورتادا
هارادا اولدوقلارين سال بير يادا
بو ييين ده ضعفي آرتير كاسلانير
او ييين ده حوسنو آرتير نورلانير
بو ييين ده قارجاشير قارنيندا قورد
او يئيير اوندان دوغور عشق و دود
بيري پاك تورپاق، بيري دوزلاقدي، دوز
بو فيريشته آيريسي دئودير، قودوز
٢٧٥ سو شيرين سه يا آجي صافدير، دورو
اوخشاييرلار بير بيره ياشلا قورو
جهل الي ذوق اهلينه قازماز قويو
آنلايار او شور سودان شيرين سويو
مؤعجوزو سئحره برابر گؤرسه دير
بيلمز او اووسون ندير مؤعجوز ندير
الده توتماق لا عصا اووسونچولار
ظن ائديرلر اؤزلرين موساديلار
بو عصا ايله اونون باخ فرقينه
جهره ني تاي سانما گردون چرخينه
٢٨٠ دالداسيندا بو ايشين وار لعنتي
او ايشين واردير سونوندا رحمتي
قاشقاليقدا حق دانان بوزينه دير
قاشقاليق آفت دگيل سؤيله ندير؟
سيناسا اينسان نه يي، عنتر سينار
اينسان ائتسه هر نه، عنتر يانسيلار
ائيله ديم من ده اونون تك، ظن ائدير
ليك او آيرينتي سين بيلمز ندير
وار بونون باش ايمه سينده بنده ليك
ليك اونون باش ايمه سي شرمنده ليك
٢٨٥ سجده يه باش قويدولار خيرايله شر
شر اييلدي خيره تا چاتسين خطر
ايكي اوزلو اودوزار مؤمن اودار
بونا رحمت دير اونا اودلو مزار
ديبده مؤمن مات ائدر اوينار توكو
ايكي اوزلو داشييار حسرت يوكو
بير اويوندور ليك يوللار آيريدير
بيريسي مروي بيريسي رازيدير
هر بيري قيزغين قورور اؤز يؤنده مين
آدينا اويغون توتور داييم كمين
٢٩٠ دئسه لر مؤمن اوره كدن خوشلانار
اودلانار عكسين ديينده داشلانار
سئويلير بو آد اگر، ذاتيندادير
اونداكي پيس ليكده، آفاتيندادير
ميم و واو و مين و نون وئرمز ووقار
سؤيله آددان باشقا بو سؤزده نه وار
گر مونافيق آدلاساق بو آد يقين
قلبيني سانجار اونون چوشلار تكين
يوخدو بو آددا اگر اوددان نيشان
بس ندندير كيم اولوب اودلانديران
٢٩٥ آددا آخسارليق يقين معناده دير
آجي ليق قابدا دگيل درياده دير
حرف قابدير سو اونون معناسي دير
عنده ام الكتاب درياسي دير
آجي يا شيرين سويا تايدير جهان
اورتاسيندا برزخ لايبغيان
ايستر اولسون سو شيرين، ايستر آجي
كؤكلري بيردير دولانما قيقاجي
قيزيلين ياخشي پيسين آنلار محك
اولماسا الده محك زاي دير امك
٣٠٠ اولسا جاندا حضرت حقدن محك
شك يقيني اوولاييب قورماز كلك