ایسته ییرم + وحید شکرزاده

ایسته ییرم

بیر دنه یار ایسته ییرم ، دردیمه درمان اولسون

منی مجنون ائتسین ، اؤزو لیلی دوران اولسون

گؤزلری آهو گؤزو ، قاشلاری دا اَیری کامان

باخیشلارین اُخ تک آتیب ، گؤزلریم حیران اولسون

گولوشو نازلی شکر ، لبرلری بالدان دا شیرین

باخدیقجا او تایسیز یارا ، کونلوم پریشان اولسون

قد و قامت نومره ییرمی ، یئریشی جانلار آلان

کاشکی بو دیلبریم هر گون ، قلبیمه مهمان اولسون

سسی سازلی سؤزو آوازلی اولان دوزلو نیگار

منی سئودیکجه بو جانسیز اؤلو جیسمه جان اولسون

دیلینه عاشیق اولان ، یوردو اوچون جاندا وئرن

جانانا هر نه واریم همده جانیم قوربان اولسون

شاعیر : وحید شکرزاده

تورکون مارالی

تورکون مارالی

قلبیمه سولطان ، تورکون مارالی

ندن گزیرسن ، مندن آرالی ؟

کونلوم اولوبدور ، ای یار یارالی

عشقینه سولطان ، آختارسان منم

دوزلو بیر اوغلان ، آختارسان منم

گؤزل دئیلم ، بلکه گؤزونده

گیزلتمه سؤیله ، بونو سؤزونده

گؤزللیک گرک ، اولسون اؤزونده

گؤزلرن حیران ، آختارسان منم

جان وئرن جانان ، آختارسان منم

قیزیلدان ائویم ، یوخدور دیلداریم

باهالی ماشین ، یوخودا واریم

اورتا قازانجلی ، اینسانام یاریم

حلال چالیشان ، آختارسان منم

خوشبخت یاشادان ، آختارسان منم

اوزلو دئیلم ، گئچم قاباغان

اوپوجوک قویام ، گؤزل یاناغان

اولا محبت ، کونلونده یاغان

سندن اوتانان ، آختارسان منم

تک سنه باخان ، آختارسان منم

مجنون دئیلم ، چوللرده گزم

فرهاد دئیلم ، داغلاری دلم

کرم دئیلم ، دیللره دوشم

سؤزونده دوران ، آختارسان منم

عاشیق دوران ، آختارسان منم

اینانما بیر گون ، دیلیمی آتام

آنا دیلیمی ، اؤزگه یه ساتام

تورکو دیلیمه ، باشقا دیل قاتام

یوردونا یانان ، آختارسان منم

وطنه قوربان ، آختارسان منم

شاعیر : وحید شکرزاده