دوزلی اوغلان آذربایجانی تورکی شعر موزیک

قرآن ناغيل لاري

اسكندر و خضر نبي نين داستاني

نوح دان سونرا شرق ايله غربه حؤكوم سوره ن تكجه بيري وارميش سادا ،اودا اسكندر ايدي. اسكندر كي ذولقرنين و عياش آديله ده اوننان ياد اولوري تانري طرفيندن ائله بير گوجه و بيلي گه صاحيب ايدي كي هرنه ايراده ائديردي اولوردي. حتتا بولوت لاردا اونون امرين ده اولاراق اونلارا مينيب دونيانين هاراسينا كؤنلو ايسترسه گئديردي و اؤنون ده ائله بير ايشيق ساچيليردي كي گئجه ده ، گوندوز كيمي ايشيق اولوردي. او يئر اوزونده او تورپاقلارا جان ظفر بايراقي داشيدي كي گونشين چيخديقي و باتديقي يئر لره قَدَر ، كيمسه قالمادي اونون آديني ائشيت مه سين .

اسكندرين آناسي روم امپراطورونون قيزي " هلاله " ايدي. هلاله آغير بير خسته لي يه ياخالاناراق اسكندروس آدلي بير آغاجين يارپاقلاري نان ساغلام ليغيني تاپير كي بو اوزدن ده اوغلونون آديني اسكندر سسله يير . اسكندر تانري نين ايلهاميني قلبينده دوياركن ائله بير قودرَته وبيليگه صاحيب ايدي كي هر نه يي ائشيديردي و هر بير گيزلين سيرري گؤزلردن اوخويوردي.

اسكندر، خلقي بيرجه تانري يا دعوت ائتمك اوچون گؤره و تاپيپ آللاهين امري ايله آزجا بير قشون لا يولا چيخير . اسكندر هانسي اؤلكه يه چاتير حيكمت لي سؤزلرله آللاهين عظمتي ني ياد ائديب تانري يا اينام بسله ين لره بركت ديله يير.

هانسي بير خلق ده آللاهين بير لي ييني دانيب اينكار ائديردي قارانليق هر يئري بورويوردي.گوندوزون ايشيقي ظولمته چئوريليب كيمسه ، كيمسه ني گؤرموردي. آنجاق اينسانلار بئله بير معنوي گوجو اسكندرده و اونون كلاميندا گؤره ركن بيرجه تانري يا ايناناركن عذاب دان قورتولوردو لار.

اسكندر بئله ليك له يئر اوزونون سولطان ليقيني قازاناراق بير يئره چاتير كي اورانين آداملاري ، يأجوج مأجوج دان سؤزآچيب قورخولاريندان داغلارا سيغينميش ديلار.

يأجوج مأجوج لار آداما بنزه سه لرده هئچ بير ديل قانمير ديلار. اونلارين بوي بوخونو دؤرد بئش قارش اولاراق لوت و چيپلاق گزير ديلر. ساغ سول قولاقلاري دا بير بيريندن فرقلي ايدي. بير قولاق لاري قيللي ايدي بير قولاق لاري يون لي.قولاق لاري دا ائله زيرپي ايدي كي ياتاندا بيريني دؤشك ائدير ديلر بيريني يورقان .اونلار ين يئديك لري تكجه نهنگ ايدي و هميشه طوفاني گؤزله ييب او نهنگ لري گوده رديلر كي طوفان اونلاري ساحيله آتديقدا بير داها دريايا دؤنن مزديلر. آنجاق نه زامان كي ساحيل ده يئمك لري اوچون نهنگ اولموردي ، قارينلاريني دويورماق اوچون تارلا لارا هوجوم چكيب بوتون بيتگي لري و جانلي لاري ييرتيجي ديش لري له ديديب دئشه رديلر.اونلار آري كيمي ويزيلتي يا دوشدوك ده سس لري جانلارا قورخو سالاركن ايلان لار و عقرب لرده قويوب قاچارديلار.

اسكندر هوندور بير داغا چيخاراق اونلارين ساييسيني او قَدَر چوخ گؤردو كي اگر او داغ دان آشماقي باشار سايديلار ، دونيادا هئچ بير ياشيل ليق و جانلي ليق قالما ياجاق ايدي.

اسكندرين  گؤستريشي ايله جماعت ، دمير و ميس معدن لريني داغلار قوينوندا تاپيب اَله كئچيره رك ، قاينار ميس لر له دمير لري بير بيرينه قاتيب ايكي داغ آراسيندا ائله بير سدّ ووردولار كي سدّين بويو داغلاردان دا اوجا اولدو . يأ جوج و مأجوج لار چوخ چاليشسالار دا، سدّ دن آشماقي باشارا بيلمه ييب آج ليق ، سوزلوق و يورقونلوق دان هاميسي قيريليب اؤلدولر.

اسكندر دونياني دولاشيب فتح ائتديك ده تانري نين اَن مقدس ملك لريندن بيري " رَفائيل " ده اونونلا بيرليك ده ايدي كي بير گون اسكندره قارانليق لار دونياسيندا  اولان حيات چشمه سين دن سؤز آچدي و دئدي: " كيمسه او بولاغين سويوندان ايچير سه ياشار اؤلمز بير حيات سوره بيله ر. "

آنجاق " رَفائيل " او يئرين هاردا اولدوغون دان سؤز آچمادان قاناد گريب عرشه گئتدي .

اسكندر بو حيات چشمه سي نين سويونا اَل تاپماغا خاطير اون ايكي ايل قارانليق لار وادي سينه ساري آلتي مين آتلي ايله يول دؤيدو و چاتديلار بير يئره كي داها گؤز گؤزو گؤرموردي. اسكندرين ايسته يي اوزره بير ماديان كي اونون گؤزلري قارانليقدا ايشيلداركن اؤنونه نور ساچيردي حاضير لاركن اسكندره تقديم ائتديلر.بو آرادا " خضر نبي " كي مين نفرليك بير قوشونون باشچي سي ايدي قشون لا بير ليك ده اسكندري تك قويماييب اونونلا آياقلاشدي. اسكندر كي چوخلي بيليك لره و مهارت لره صاحيب ايدي سير كيمي گيزلت دي يي گيرده قيرميزي مؤهره لره صاحيب ايدي كي اونلاري يئره ووردوقدا  پاتلاركن هر يئر ايشيق اولوردي.  اونلاردان بير نئچه سين ده وئردي خضر نبي يه كي لازيم اولورسا فايدالانسين .

اسكندر و ظولماتا آياق باسان بوتون قشون ، يو لو چاشيب بير بير لريني ايتيره ركن تكجه خضر نبي ائده بيلدي كي او چشمه ني تاپيپ سويون دان ايچه رك ايچينده دوشوب چيم سين . حيات چشمه سي نين سويو يئر دن چاغلاييب جوشاراق قارانليقي بير آي پارچاسي تك ، ايشيق ائديردي.  سويو سود دن بياض ، پارلاق ليقي ياقوت دان ايشيلتي لي و دادي بال دان شيرين ايدي. خضر نبي بئله ليك له ياشار بير حياتا قاويشاراق اسكندر و خضر نبي نين قُشونو بير چؤل دن باش چيخارتديلار كي اورانين قوم لاري لعل ايله ميرواري ايدي و اؤن لرينده ده محتشم بير ساراي گؤرونوردي.

اسكندر ، سارايين پيلله لرين دن يوخاري چيخاراق شوكت لي بير تا لارا اوغرادي و داما چيخديقدا  ، دونيادا هرنه يه گؤزل و سئويملي دئييليردي ، گؤزلري اؤنون ده نقش اولدي. اسكندر بو گؤزل ليك لره واله اولاراق  بير دن بيره بير جوان گؤردو كي سيماسيندان نور جالاناراق آغ آبباغي ايپك پالتار لار گئييب دي.  او ياخينا گليب اؤزونو تانيتديردي و دئدي : " من صور اسرافيله م و آللاه تعالانين امري له بوردايام كي هاچان بويورسا دونيانين بيتمه سي ني ،اَليم ده كي شئيپور ي چالماقلا اعلان ائده م ."

اسكندر درين دوشونجه لره دالاراق ، صور اسرافيل دن آيريلدي و او سئحير لي گؤرونن و عجاييب لر له دولو قصردن ديشاري چيخدي. سونرا قشون لا بير ليك ده دوشدو يولا كي گئديب لشكر ه چاتسين كي  ايندي اونلاردا نيگرا ن ايديلار.

 بئله ليك له اسكندر بئش يوز ايل ياشاياراق ، تاكي وارايدي، بوتون يئر اوزون ده كي اؤلكه لره اقتدار لا و توحيد شعاري نان حؤكوم سوردي .

	قرآن ناغيل لاري : اسكندر و خضر نبي نين داستاني
	عليرضا ذيحق
	60  KB
	PDF
	آذري توركجه
	آذري عرب اليفباسي