صالح پیامبرین ناغیلی
قرآن ناغيل لاري :
" صالح " نبي نين داستاني
چوخ كئچميش لرده ، شام و مدينه فاصيله سينده " ثمود" آدلي بير بؤيوك ائل ياشاييرديكي دونيانين كئفين داماغين چيخارداراق محتشم ساراي لارا صاحيب ايديلر. ثمود ائلي نين يايلاق لاري و اورانين گؤزل طبيعتي ، سرين بولاقلاري و قاينار سولاري ، بوتون احساسلي و زنگين اينسانلاري اورا يا چكه ركن ، او خلقه بوللو ثروت و شن ليك قازانديريردي. آمما اونلار بيرجه آللاهين وارليقينا اينانمادان يئتميش بُت لاري وار ايدي.
آللاه تعالا اونلاري دوز يولا هيدايت ائتمك اوچون ، صالحي كي 16 ياشيندا گنج بير اي ييت ايدي و تانري نين وارليقينا و بير لي يينه اينانان بيري ، پيغمبر لي يه مبعوث ائدير تا خلقي ايرشاد ائتمه يه چاليش سين . " صالح " حضرت لري چوخ دئسه ده اونلار آز ائشيدير لر تا كي بير گون ائلين باشچي لارينا و بُت لاري چوخ تعصب و اينانج ايله قُورويان لارا دئدي :
" من له بير شرطه گيريب باغلاشاراق گئده جه ييك بُت خانا يا و پرستيش ائتدي يي نيز بُت لاردان تكجه بير سوآل ائده جه يه م .اگر اونلاردان حتتا بيري ده منيم جوابيمي وئره بيلدي ، من داها بير كلمه سؤزده دانيشمايا جاغام. آمما منيم ده سيزدن بير ايسته ييم اولاجاق اودا بوكي هر واخت داردا قالدي نيز و بيرجه آللاهدان يارديم ايسته يه ر ك او سيزين داديزا چاتدي بت لارا شوبهه ائديب بيرجه آللاها ايمان گتيره سيز. "
صالح نبي ، ثمود ائلي نين بت لارينا ياخين لاشاراق اونلارين آديني سوروشدي آمما اونلارين هئچ بيرين دن نه ترپه نيش گؤروندو نه سس. بت پرست لر ده آجيق دان اؤز ايچ لرين دن يئتميش نفر آدام سئچيب صالح نبي ايله بيرليك ده اوجا بير داغ باشينا چيخاراق دئديلر :
" اگر سنين تانرين او قَدَر كي سن دئييرسن گوج لودي پس تئز ليك له بو داغي ياراركن همَن بو آن ائله قير ميزي توك لي و حاميله بير دوه گؤستر سين بيزه ."
صالح نبي دوعا ائديب تانري دان بو معجزه ني ديله ركن داغين زيروه سي سانكي قوم تك اُ وولاراق بير دوه گؤروندي. بت پرست لر ايشي بئله گؤره رك يئنه باشلاديلار دببه چيخارتما غا :
" اگر گؤرونمز بيرجه آللاهين بو قَدَرقودرَتي وار پس تئز اولوب اونون بالاسيني دا دونيايا گتيرسين!"
تانري نين ايسته يي له او دوه دوغاراق ، اَمليك بالا دايلاق دا سوت عوضينه باشلادي تيكان يئمه يه .
ثمود ائلي نين باشچي لاري بو عقله سيغماز و تكجه معجزه ساييلان بو عظمت لي ايشه شاهيد اولسالاردا ، ايچ لرين دن تكجه بئش نفر صالح نبي يه ايمان گتيردي و باشقالاري او معجزه ني سئحير و جادو آدلانديرديلار.
صالح نبي خلق ايچينه قاييداراق هامي يا دئدي :
" صاباح سحرهامي ال ده بايدا مئيدانا ييغيشيب بو دوه نين سوتون دن نه قدر ساغاجاقسيز ساغين !"
صاباحي يوز لر نفر دوه نين سوتون ساغيب بايدا لارا دولدوراركن صالح نبي نين رسالتينه اينانان لار چوخالدي لار. بو اوزدن ده كافر لر وحشته دالاراق او دوه ني پئي لي ييب اؤلدورمك ايسته ديلر . بو ايش دن چوخ لاري قورخوب چكين سه لرده " صدوب " آدلي زنگين و دونيالر گؤزلي اولان بير قادين ، كي صالح اونون عشقيني ردّ ائتميشدي اينتيقام آلماغا قالخدي و" مصدع " آدلي بير كيشي يه كي چوخ گوجلو و رحم سيز بيري ايدي كام وئره رك اوننان ايسته دي كي تئز ليك له دوه ني اؤلدوروب باشيني بدن دن آييرسين . اوتك اولماسين دييه " صدوب " ، " عنيزه " آدلي بير روسپي دن ده ايسته دي كي " قدار " آديندا شهوت دوشگونو اولان بير كيشي يه قيزيني پئشكئش ائله مك له اونودا " مصدع " ين يارديمينا يوللاسين.
اونلار ايكي ياندان دوه ني اوخلاييب قيلينج ايله باغريني پئيله يه رك باشلايير لار اَتيني پايلاماغا .
بو آرادا دوه نين بالاسي آناسي نين اؤلدورولمه سيني گؤر دوك ده غوصصه له نه ركه باش آلير گئدير داغلارا و داهاكيمسه اونو گؤرمه يير .
صالح ين بو ايش دن خبري اولاراق دئيير:
" بلكه گئديب او دايلاقي تاپيپ گتيره سيز كي يو خسا عذابيز چوخ آغير اولاجاق !"
بوتون ثمود اهلي او دايلاقين داليجا گزيب دولانسالاردا سانكي بير دامجي سو اولوب باتميشدي يئره . داها ايش ايش دن كئچميشدي و تانري نين عذابي ياخين ايدي. سونكي گون كافير لرين اوزو سارالاراق ، ايكينجي گون دؤندي قان چاناغينا و اوچونجو گون آللاه تعالا هاميسيني قره لده ره ك جبرئيلين فريادي ايله اود آلاو اونلاري يانديريب كول ا ئتدي.
آنجاق صالح نبي يه و او نون اينانديغي بير جه تانري يا هركس ايمان گتيرميشدي ، بو بلا لردن اوزاق قالدي و او گوندن بري ، ثمودائلي نين شن لي يي و بركتي آرتاراق صالح نبي ده يوزيييرمي ياشينا جان ، سؤز لري و عمل لري نن خلقي هيدايت ائتمه يه چاليشدي.