اگر یوخویدوسا --- نصرت کسمنلی
اگر یوخویدوسا ...
آغ بیر دونیا ایدی ، اوگونکو دونیا
« آی » دا کؤکسوم اوسته دوشموشدو اوگون
بلکه حیات ایدی بلکه ده رؤیا
آچیلدی یاخاسی ، ماوی بیر گؤیون
ناغیلا دوشموشدوم بیر آغ ناغیلا
اوره گیم اووجومون ایچینده ووردو
حس لر یئر وئرمه دی اوگون آغیلا
بیر علوی خومارلا ، قارشیمدا دوردو
دونیا اوزو بویدا ، قار یاغدیرمیشدی
یاندیردیم بو بیاض آغلیق ایچینده
دونیا یامانلیغی یادیرغامیشدی
تمنا یوخ ایدی ساغلیق ایچینده
بولودلار گؤزونو سیخمیردی داها
گؤزو یومولویدو دویغولارین دا
هیچ کس متاعینی ساتمیردی باها
آیدینلیق گؤروردو ، یوخولاریندا
شیرین لیک آخیردی بولاغ دان اوگون
کونلوم سو گؤلونده چیمیردی ، نه غم
دئدیم اوجا داغلار سیزده دیز چؤکون
بو گون من سیز لردن یوکسه یم
سؤزومه باخیرکن ، بیاض تپه لر
سونبول شلاله لر ، اوستومه آخدی
اه نه لر یازیلدی عومرومه نه لر
نه دئییم سویله مک بلکه گوناهدی !
کؤکسومده گول آچدی چاغلادی یازیم
او یازی دونیانین باهاری ساندیم
او حیات ایدیسه یوخو نه لازم ؟
اگر یوخویدوسا نییه اویاندیم ؟!
شاعیر : نصرت کسمنلی