مثنوی
مثنوي
آه ! وآه ! اي امت خير البشر
گلدي تهراندان بو گون بير بد خبر.
کي، ائديب وهابيان بي ايمان،
روضه پيغمبري بومباردومان.
سالميش ايرانه تزلزل بو خبر،
تعزيه برپا ائديبدير شيعه لر.
گئنه وئردي اذن گؤز ياشينا خلق،
سيلله و يومروق وورار باشينا خلق..
روضه خوانلار الده منديل عزا،
آغلادار خلقي بصوت غم فزا.
سرگذشت کربلادن آرتاجاق،
بو حكايت ائتدي خلقي بي داماق.
آغلادانلار، آغلايانلار مثل نئي،
باشينا سامان سپر اهل گونئي.
مثنويده خوش دئييب ملآي مست،
"دم سگ از ريش نادان بهتر است".
روضه خوانلار شيعه ني بيروح ائده ر
سينه زنلر سينه ني مجروح ائده ر.
چون الين قاوزار گؤيه زنجير زن،
سسله نر زنجير، هم بيت الحزن.
مؤمنين يوخدور توپو، طياره سي،
اؤز اؤزون دؤيمكدير آخير چاره سي.
لعنت ائيلر انگليسه خاص و عام،
انگليسين رنگيدير بو، والسلام.
انگليسه زوروموز چاتمير آمان،
سن يئتيش امداده يا صاحب زمان .
چك قيلينجين حمله ائيله لندنه،
قير، داغيت ماننده توخم پربينه.
غيرتين چوخدور و هم زوروز سنين،
بيزده ايش يوخدور، بيليرسن سن اؤزون.
سن قيلينج وور کافير اؤلدور اي آغا،
من قويوم ساققاليما رنگ و حنا.
وور جيدايا سن او کفارين سرين،
من ائديم سيغه او کافير قيزلارين.
سؤيلر هر کس کوچه و بازاردا
انگليس بارماغي وار بو کاردا.
او ائدير تحريك وهابيلري،
حكمتي وار بو ايشين، اي همشري.
انگليس اول حيله کار آوروپا،
روضه پيغمبري باغلار توپا.
بو جهتدن کي، عجم غمگين اولا،
تعزيه بر پا ائده صبح و مسا.
گونده يوز سيب چاي آلا، مين پوت شكر،
تكيه لرده صرف ائده شام و سحر.
سن ايچرسن چاي، اولارسان اشكريز
گونده بير يوك پول قازانار انگليس.
او بيليرکي، بير مصيبت وئرسه اؤز،
شيعه لر قارا گئيه ر اوغلان و قيز.
لا اقل ايراندا وار اون دؤرد کرور
شيعه خالص، سئواي از شل و کور.
هر بيري آلسا قارا چيك اوچ چرك،
از براي کؤينك و شال و بره ك.
بس گرك وئرسين قيران يئددي کرور،
تا قارا گئيسين گروه بي شعور.
سن کي بيلمه زسن حساب و هندسه،
پس گوجون چاتماز سنين انگليسه.
آغلاماق مشقين وئريب فاضيل سنه،
فاضيل دربندي تك عاقيل سنه.
اوخويوبسان چون فقط سن بير نصاب،
اول جهتدن بيلميسن قارداش حساب.
ضارب و مضروبله اللشمه چوخ
جبر اوخو، ابوابدا بير نفع يوخ.
اؤز بئزين وئر کربلايي باغيرا
هاميسين باسسين کوپه، ائتسين قارا .
اينيوه گئيسن اونو کوسمه ز امام
"خوش دئييل رنگي" دئمه ز فخر انام.
گر آخوندا سؤيله سه باققاليميز،
کيم دئيه ر قيرخيلماسين ساققاليميز.
هر توکونده ساققالين وار بير ملك،
بو حديثين اولمايا اصلي گرك.
کفرونه امضاأ قويار في الفور آخوت،
هيچ کس آلماز او باققالدان نخود.
انگليس اما سؤيور پيغمبري،
توپا باغلير اول مكان اطهري.
آليريق اوندان گئنه بيز استكان،
لاله و لامپا و قند و چايدان.
ايلده يوزمين استكان مرحوم اولار،
ا نگليسين جيبينه پوللار دولار.
اللي مين سموار قاينار صبح و شام،
بو سماورلر کيميندير، آي بالام؟
باخ، اوتان شالواريوا، تومانيوا،
مخملين يئل ائيله مه جانانيوا.
آلميسان باققالدان ياغ آشيوا،
قويموسان عمامه تنظيف باشيوا.
بس سنه لازم گلير تنبيه اولا
بعد وورروق تازيانه باققالا.
معني پورتستي بيلمك شرطدير،
بيلمه ييرسن، چونكي، ذهنين پرتدير.
لعنت ائتمه انگليس کافره،
ايچمه چايين، استكانين وور يئره.
اطه ، ماهوتا، ماهوت وارييه
مشتري کيمدير عمي چيلوارييه؟
يارماسايدي کله سين ميرزا موسي،
انگليس ساتمازدي اون مين توپ خاصا.
خلقي تحريك ائتمه سه يدي شوشتري،
کيم اولاردي بو متاعه مشتري؟
ووردو باشين منبره فاضيل کيشي
من ده يارديم باشيمي ياي و قيشي.
معجیز شبستری