عزراییل
عزراييل
آرزو ائيله ديگيم شئيلره اولدوم ناييل،
ايندي راحت وئره رم جاني، گل آل عزراييل.
نئچه ايل ايشله دي نوودان باشيما بو آندده،
ايت ايله قول بويون اولدوم گئجه لر ظلمتده،
ايچدي زهر اجلي ، قالمادي طاقت ايتده،
ايندي راحت وئره رم جاني، گل آل عزراييل.
ياندي هر ياندا چيراق، اولدو گؤزوم نوراني،
آومسيون غيظه گليب سالدي يئره نووداني،
آچدي ميخانه ، ايچيب تازه له ديم ايماني،
ايندي راحت وئره رم جاني، گل آل عزراييل.ل
آچ گوزون بير نظر ائت مدرسث نسوانه،
گؤر نئجه نامه يازير قيزلاريميز هر يانه،
وئر خبر مرده شورا ، روضه خوانه ، گورآانه،
ايندي راحت وئره رم جاني، گل آل عزراييل.
سنگ فرش ائيله دي بازاري بئش آلتي معمار،
هم ايشيقلاندي او مرحوم قارانليق بازار،
ياتدي ايرانلي يوز ايل، اولدو نهايت بيدار،
ايندي راحت وئره رم جاني، گل آل عزراييل.
بلدييه دايانيب فييل آيمي بير وئردي تكان،
سكيلر دوشدو يئره، اوچدو گؤيه سقف دآان،
اؤلولر ائيله دي هم چئرگيزييه نقل مكان،
ايندي راحت وئره رم جاني، گل آل عزراييل.
قيش گلير تيكديريري بوللو لباس فاخير،
وارلي ساققالي قويور، يوخسول بيچاره باخير،
اؤلمه ديم آخر چرشنبه ني گؤردوم آخير،
ايندي راحت وئره رم جاني، گل آل عزراييل.
ساعت نحسده هرگيز سفر ائتمه ز ملت،
نه توي ائيله ر و نه آستار آؤبه مؤمن ملت،
قمر عقربده دگيل ، خوشدو بو گونلر ساعت،
ايندي راحت وئره رم جاني، گل آل عزراييل.
عيد نوروز گلر خوشدل ائده ر بزازي،
ار فقير اولسا، بوغار غصه و غم گولنازي،
چيت باهادير، خانيمي من نئجه ائيليم راضي،
ايندي راحت وئره رم جاني، گل آل عزراييل.
وئردي بير مصده بو گون ملته شيخ فاضل،
دئدي: جنتده نه چاي واردي، نه مشد اسماعيل،
قلبدن چاي، جيغالا غصه دن اولدو زاييل،
ايندي راحت وئره رم جاني، گل آل عزراييل.
اولدو جمع قيزلاريميز مدرسه نسوانا،
قلم آلدي الينه نامه يازير هر يانا،
آرزو قالمادي قلبيمده، قسم بو جانا،
ايندي راحت وئره رم جاني، گل آل عزراييل.
معجزين سين شريفي اولوب آلتميشدان چوخ،
يوز مين ايلده ياشاسا، عاقبتي يوخدور ، يوخ،
يئميشم يئددي لويني، پيلاوي، قارنيم توخ،
ايندي راحت وئره رم جاني، گل آل عزراييل
معجز شبستری