گئنه واردیر
گئنه واردير
بو دلبر صد ساله ده حالت گئنه واردير،
گيسوي سفيدينده طراوت گئنه واردير.
حالا گزيري مرغ خيالي آرالاردا،
گول غنچه لبينده او لطافت گئنه واردير.
گرچه تؤکولوب ديشلري، ميمونا دؤنوبدور،
اما يئريشينده او نزاکت گئنه واردير.
تغيير تاپار حالتيميز، عادتيميز يوخ،
حمامدا، مسجدده کثافت گئنه واردير.
گز چمچه آوناني ، ليواني ، کوزه کناني،
قابلاردا، قاشيقلاردا، بدايت گئنه واردير.
قرآن اوخوماق، بئز توخوماق،کوفته پيشيرمك،
اولكي ترقي، او تجارت گئنه واردير.
گرچه چوخاليبدير پينه چي، فالچي، ديلنچي،
آمما نه دئييم، کشف و کرامت گئنه واردير.
ائيلردي ازه ل خسته و سيسقا ، قوجا، جاهيل،
هر آي باشي بير دفعه حجامت گئنه واردير.
هر درده دوا گؤيزيره ، جوشنده ، ايماله،
شوکر ائيله خدايه، او طبابت گئنه واردير.
هر ائوده بئش آلتي باشي داز قيز، کئچل اوغلان
حمامدا فرياد و قيامت گئنه واردير.
مايلدي کفن گئيمگه، باش يارماغا قارداش،
حمد ائيله رم آللاها ، او عادت گئنه واردير.
شالوار گئيه لي هر برکت گئتدي دئييرلر،
شوکر ائيله باجي، گئيمه ين آرواد گئنه واردير.
کيمدير کي، دئيير گئتميري عورت نوغا ايندي
شوکر ائيله باجي گئتمه ين آرواد گئنه واردير.
آغ، چاق قيچي آللاه ياراديب بنده سي گؤرسون،
گئت آهريزه بير باخ، او رذالت گئنه واردير.
ايام محرمده قديم جرگه گئدرديك،
ترك اولدو، ولي اؤزگه جنايت گئنه واردير.
کؤهنه دي دئسه م سؤزلريميز، مسجده گئتديم
غصه ائله مه، تازه روايت گئنه واردير.
يوخدور تازا سؤز، بيلمه لي سن مرثيه خواندا،
معلوم اولونان وحي و رسالت گئنه واردير.
رمالدا، درويشده، ايلانچيلاريميزدا،
تاثير نفس،کشف و کرامت گئنه واردير.
ترك اولدو شبسترده فقط دسته شاخسئي،
تبريزده ارباب شجاعت گئنه واردير.
معجز ! دئمه ديم من سنه بو سؤزلري يازما؟!
اول واريدي سنده سفاهت ، گئنه واردير.
معجز شبستری