سنیم ارک
زیبا کرباسیبوردان دینله یین
.

نئجه ترپه‌شیم ترپشمه‌سین سو سودان
قیش، قار یاغیشدان
میس مئژمئییی‌لرده گزن توتلارین آغی قاراسیننان
دییمی نئجه دییم، ده‌یمه‌سین نئینیمه
نئینیمی نئجه نئینه‌دیم، قوشولماسین ائلییمه.
دلیم سننن ....سنیم مننن.... منیم،منیم ارک.... سنیم ارک
او بویدا آللاهین آرخایین چیین‌لریننن غریب،
آیاق یالین قاشمیش بو شعرین قافاسینا.
قالان به قالان ارک بویونو، بوینومون اوجاسیننان سوروش،
سئوگیمی پارتداتمالاردان چارتلاییب ییخیلمایان، قالان قالاننان.
گوجومو بینؤره‌می، میللت‌ین غیرتلی قالیشلاریننان ...قان اَرخه دایانسادا ییخیلمارام

آغ دسمالیوی دولاندیر
شئیطان تورو دینجه‌لن گوشه‌لرین توزون آل.
دردین آلیم، الدن اله بیز... زمانی‌دی
کؤهنه تخته ایشکافلاری آچ
دیلابلاری دیندیر
بزه-دوزه تاخچالاری
سئرچه ساعاتین قور قوی قوقولداسین
وخت وئرمه.
ساری سالفئت‌لری سال میز اوسته
صاندیق‌خانادا بوتاخلی بوخچالاری سلقه‌له.
بنؤوشه‌لی چینی بولود بوشقابلاری چیخارت گنجه‌دن،
سازی‌نین نازین آل، بئلین اینجه‌له،
اوزه‌رریک‌لری سال تولاما تورلارا،
چایخانالارداکی یئکه‌پر سماوارلاری دولدور قئینه‌سین.
قوناخ گلیر دئییللر، بالا زرخانیم
الدن اله بیز... زمانی‌دی.
قان گؤزلریمی توتوب
اتک‌لر، اؤرتوکلر آلتیندا
قانلی دمیرلر اوینور.
دلیم سننن ....سنیم مننن.... منیم، منیم ارک.... سنیم ارک
ییخیلا اگر
اووووووووی، بوی دئمیرم
قوناخ باجی
ائله گلن دانقالارووی توت، یاواش سوزول گئت.
بورا ارک، ارک، ارک مئیدانی‌دی،
بو لوت هو چکن تبریزدی.
..