گئجه‌نی گئجمده دیسکیندیرن هیرنالار
زیبا کرباسی
.
.ş
بوغازلاردا یوخام بو سؤزلرده ... اوخوشلاردا ... اوخشامالاریم
باخیشلاردا یوخام ... اوزانمیش آغ مله‌فه‌لرده .. دوداقلاریم قان
اوجا مه‌مه‌مین اوجو قانچیل
چین‌چیل تونکه‌مین باغی دولاشمیش جورو بارماغیما
اود کیمین باخیشلاریمدا سنی جیززا جیز یاندیرمالاردا یوخام.
گئجه‌نی گئجمده دیسکیندیرن هیرنالاردا
ایلدیریملاری قورخودان هؤکوتمه‌لرده
الیفووی گیلیفووه دولاشدیران
آی جان دا بسدی، بسدی
سیقار توستوسون اؤسکورتمه‌یه سالان چکه‌چکده
توز تورپاغین گؤزونه گیرن هاوالاردا
دیل - دیل چاغیریب، دیلسیز هویوخوب باخمالاریمدا
اؤلوم نه‌یه دییللر؟
دار، اوزون نودانلار ... آریخ قارانلیخ هشتی‌لر
دیمیر قاپی، اؤرمز* اؤرتوک، یون یورقان – دؤشک
بو یوکلو خورتان دوه بوغازیمدان کئشمیر
ساققیزین وئر چئینه‌سین.
اؤلوم اؤز قارانلیخ گؤزلریندن سونرا هئچ نه‌یه بنزه‌مز
دسمالیم آغریر،
باشیمی وئر باغلییاخ
یون چیرپان کیمی آغاشین الینده گزمه، چئتی قولی
بئلینده‌کی قاشیغی آش، آشووی ایش.
بوغازلاردا یوخام .. بو سؤزلرده، اوخوشلاردا اوخشامالاریم.
.
__________
.
*اؤرمز: بیر نوع پارچا آدیدیر