جهنمده بیتن گول
جهنمده بيتن گول
فلكين قانلي اليندن بير آتيلميش يئره اندي،
بير فلاكت آنانين جان شيره‌سيندن سودون امدي،
بوللو نيسگيل شله‌سين چيگنينه آلدي.
تاي توشوندان دالي قالدي،
ساري گول مثلي سارالدي،
گونو تك باغري قارالدي،
درد اليندن زارا گلدي،
گونو گوندن قارا گلدي.
خان چوبانسيز سئله تاپشيرسين اوزون،
يوردوموزا بير سارا گلدي.
بير وفاسيز يار اليندن يارا گلمز سانا گلدي.
بير يازيق قيز، جان اليندن جانا گلمز جانا گلدي.
كئچه‌جكده “الموت” دامنه‌سيندن بورايا درمانا گلدي.
بير آدامسيز “سوري” آدلي،
الي باغلي، ديلي باغلي!
“سوري” كيم‌دير؟
سوري بير گولدو جهنمده بيتيبدير.
سوري بير دامجي‌دي گؤزدن آخاراق اوزده ايتيبدير.
سوري يول-يولچو سودور،
اَيري‌ده يوخ، دوزده ايتيبدير.
سوري، بير مرثيه‌دير اوخشاياراق سؤزده ايتيبدير.
او كؤنول‌لرده كي ايتميش‌دي ازلدن،
اودو گؤزدن‌ده ايتيبدير.
سوري بير گؤزلري باغلي،
اوزو داغلي، سؤزو داغلي،
اولوب هاردان هارا باغلي!
بوشلاييب دوغما ديارين،
اوموب البته ياريندان.
ال اوزوب هر نه واريندان.
قورخماييب، شهريميزين قيشدا آمانسيز بورانيندان،
نه قاريندان
گزير آواره تاپا،
يانديريجي دردينه چاره، تاپا بيلمير.
چوخ سئوير عشقي باشيندان آتا،
آمما آتا بيلمير.
آووا باخ، آووچي دالينجا قاچير،
آمما چاتا بيلمير.
ايش دؤنوب،
ليلي دوشوب چؤللره مجنون سوراغيندا.
شيرين الده تئشه،
داغ پارچالايير فرهاد اوتورموش اوتاغيندا.
تشنه لب قونچه گؤر جان وئري دريا قيراغيندا.
گؤزده حسرت يئريني خوشله‌ييب ابهام دوداغيندا.
وارليغين سون اثري آز قالير ايتسين ياناغيندا.
سانكي بير كؤزدي بورونموش كوله وارليق اوجاغيندا.
كؤزه‌رير پيلته كيمين ياغ توكه‌نيب‌دير چيراغيندا.
بوي آتير رنج باغيندا،
قوجالير گنج چاغيندا،
بير آدامسيز،
سوري آدلي،
الي باغلي،
ديلي باغلي!
سوري جان! اومما فلكدن،
فلكين يوخدو وفاسي،
نه قده‌ر يوخدو وفاسي،
او قده‌ر چوخدو جفاسي،
كؤهنه رقاصه كيمين،
هر كسه بير جوردي اداسي،
او آياقدان دوشه‌ني،
ايستير آياقدان سالان اولسون.
او تالانميش‌لاري ايستير گونو-گوندن تالان اولسون.
او آتيلميشلاري ايستير هاميدان چوخ آتان اولسون.
او ساتيلميشلاري ايستير، قول ائدركن ساتان اولسون.
نئيله‌مك قورقو بوجوردور،
فلكين نظمي ازلدن اولوب اضدادينه باغلي،
قاراسيز آغلار اولانماز،
دره‌سيز داغلار اولانماز،
اؤلوسوز ساغلار اولانماز.
گره‌ك هر بير گؤزه‌له، بير دانا چيركين‌ده يارانسين،
بيري اَنسين يئره گؤيدن،
بيري عرشه اوجالانسين.
بيري چالسين ال-آياق غم دنيزينده،
بيري ساحلده سئوينج ايله دايانسين.
بيري ذلت پالازين باشه چكيب ياتسادا آنجاق،
بيري‌نين بختي اويانسين.
بيري قويلانسادا نعمت‌لره يئرسيز،
بيري‌ده قانه بويانسين.
آي آدامسيز سوري آدلي،
ساچلاريندان دارا باغلي!
نئيله‌مك ايش بئله گلميش.
چور گلنده گوله گلميش.
فلكين اَيري كمانيندا اولان اوخ،
آتيلاندا دوزه دگميش،
ديلسيزين باغريني دَلميش،
اَيري قالميش،
دوزو اگميش.
اونو خوشلار بو فلك،
ائل ساراسين سئللر آپارسين،
بولبول حسرت چكه‌رك،
گول ثمرين يئللر آپارسين.
قيسي چؤللرده قويوب،
ليلي‌ني محمللر آپارسين.
خسرووي شيرين ايلن ال-اله وئرسين،
فرهادين قامتين اگسين.
باخاراق چرخ زامان نئشه‌يه گلسين.
كئفه دولسون،
سوري‌لار سولسادا سولسون،
بيري باش يولسادا يولسون،
سيسقا بير اولدوز اگر اولماسا اولدوزلار ايچينده،
بو سما ظولمته باتماز.
داش آتان، كول باشي قويموش،
داشيني اؤزگه‌يه آتماز.
سن يئتيش سون هدفه،
اوندا فلك مقصده چاتماز،
داها افسانه ياراتماز.
سوري، اي باشي بلالي،
زامانين قانلي غزالي!
سوري بير قوش‌دي خزان آيري ساليبدير يوواسيندان،
ال اوزوبدور آتاسيندان،
جوجه‌دير حيف اولا سود گؤرمه‌ييب اصلا آناسيندان.
او زليخا كيمي يوسف اييين آلمير لباسيندان.
بونا قانع‌دي تنفس ائله‌يير، يار هاواسيندان.
درد وئره‌ن درده ساليب آمما خبر يوح داواسيندان،
آغلاييب سيتقاياراق بهره آپارمير دوعاسيندان.
او بير آئينه‌دي رسّام چكيب اوستونه زنگار،
اوندا يوخ قدرت گفتار،
اوزو چركين، ديلي بيمار،
گنج وقتينده دل‌آزار،
گؤره‌سن كيم‌دي خطاكار!
گؤره‌سن كيم‌دي خطاكار!
اردبيل 10/6/1365