بیرده جاوان اولماقیما

بیر سبب یوخ دئمه روسوای جهان اولماقیما

غنچه آغزین کیمی خلق ایچره نهان اولماقیما

منی صد حیف قوجالتدی بو گوزللر سیتمی

یوخدور امّید داحی بیرده جاوان اولماقیما

قامه تین جلوه سی چشمیمده گزیر وجهی اودور

چشمه تک هر یانا ای سرو روان اولماقیما

مومیانین هوسی غونچه دهانین فیکری

سبب اولدو بئله بی نام و نشان اولماقیما

انتظارم کی ، وئرم جانیمی ، گورجک یوزونی

نولا ای گول بیر علاج ائت نگران اولماقیما

یانیرام عشق اودونا ثابت اینان مجنون تک

لیلی اولسا یاناجاق شعله فشان اولماقیما

واحیدم درد و غم غربته تابیم یوخدور

وار امیدیم یئنه اولکمده عیان اولماقیما

 

علی آقا واحد