سنین گئدیشین

 

توتولدو اوره یی ماوی گؤیلرین ،

قارا بولودلاری آلدی باشینا .

دئه گؤروم ؛ گؤیلره نه لر سؤیله دین

اونلارین نه اویون گلدی باشینا .

 

سنی یامان گؤزدن قوروماق اوچون ،

بیر بولود سالیب دیر اوستونه کؤلگه .

یولون توز ـ تورپاغین سوپورمک اوچون ،

بیر گون گئتدییین یوللاری سولاییر بلکه .

 

دئییرم بلکه ده بو قارا بولود ،

اوزاقدان بنزه دیب سنی گلینه .

اودور کی باشینین اوستونده دوروب ،

سپیر داملا لاری شاباش یئرینه .

 

بلکه ده بو بولود ،

     گؤزلریم کیمی ،

سون دفعه آغلاییر یولوندا سنین .

سوسوز قالمایاسان یوللاردا دئیه ،

قوروموش گؤللره سو ییغیر یقین .

 

کیم بیلیر ؟!

بلکه ده بو یاغیش ایله ،

گئدیش یوللارینی باغلاییر گؤیلر ،

منی دینلمه دین ، گؤیلری دینله !

سنین گئدیشینه آغلاییر گؤیلر .