نازلی دیلبر اولا

شراب اولا ، من اولام ، بیرده نازلی دیلبر اولا

بیر اؤزگه عالمی واردیر اگر میسر اولا

صفای مجلس مئی ، مین بهشتدن آرتیق دیر

بیر الده گول توتا جانان ، بیر الده ساغر اولا

اولاندا مست ، آچار زولفون نیگار ، نشئه سی وار

عمومه ذوق وئره بزم می معطر اولا

بساط باده ده حال اهلینین فداسی ، اولوم

شرابی قال ایله ایچمه ، اگر پیمبر اولا

اسیر زولفونم ائی شوخ ، گل آجیقلانما

اسیره حرمت ائدرلر اگر کی کافر اولا

نه لیلی سن کیمی اولموش ، نه من کیمی مجنون

نه کاره دیر  گلیب اونلار بیزه برابر اولا

گؤرنده ، واحد ، اوزون یاریمین اسیر کونلوم

نه نوع ساکت اولار اود اولا سمندر اولا