اولسا

یار اگر مهر و وفانی دوشونن یار اولسا

غم دئییل کی بوتون عالم بیزه اغیار اولسا

اهل دل ذوق و صفانی لب جانان دان آلیر

ظلم دور عاشیقه ، جانانی دل آزار اولسا

وار نه غم گؤزلرینین خسته سینه یوخدور علاج

لب لرین چاره سین ائیلر ، نئجه بیمار اولسا

زولف و خالین او مهین گؤز یاشیم ائیلر روشن

گئجه آیدینلیق اولار ، ثابت و سیار اولسا

یار اگر عاشیقه غمخوارلیق ائتمزسه نه غم

غم اودور اؤزگه یه معشوقه سی غمخوار اولسا

گؤزلرین شوق ایله قان تؤکمه گه چوخ راغیبدیر

مست دیر ، بونجا خطا ائیله مز هوشیار اولسا

وار امیدیم منه ، واحد داها ظلم ائتمه یه جک

حال زاریمدان او مهپاره خبردار اولسا

 

علی آقا واحید