اولماسا

من نئیلرم او دلبری شیرین دیل اولماسا

بولبول باهاره عشق یئتیرمه ز گول اولماسا

مجنونون عشقی لیلی نین آرتیردی شهرتین

قدری بیلینمه ز ایدی گولون بولبول اولماسا

عهد ائتمیشم کی هر گوزه له مایل اولمایام

منسیز بلالی کونلوم اگر مایل اولماسا

درد فراقه غفلت اؤزو بیر علاج ائدر

یوخسا بو درده کیم دایانار ، غافل اولماسا

جانان جفاسینی چکن عاشیق روا دئییل

وصل نیگارینه او اگر نایل اولماسا

جور ائیله دیکجه یار منه ایسته رم اونو

ائل سئومز هر آغاجدا اگر حاصل اولماسا

واحید کونولده عشقیمی من گیزلی توتمارام

عرفانیمه تعرض ائدن جاهل اولماسا