اوز باشینا

بوراخما ای کونول ، او نازلی یاری اوز باشینا

روا دئییل قالا ائللر نگاری اوز باشینا

گؤز ایله کیپریگی بیرلیکده قان تؤکور گئجه لر

عجب قالیب گئنه دریا کناری اوز باشینا

قراره گلدی رقیب ال گؤتورسون اول گولدن

نه اعتبار اونا ، دئسین قراری اؤز باشینا

او قاره گؤزلونو گؤزدن کناره قویما کونول

بوراخماز اووچی گوزل بیر شیکاری اوز باشینا

گول اوزلولر نه قدر وارسا باغبانی منم

نئجه قویوم بئله بیر گول عذاری اوز باشینا

رقیبی یاره طرف قویمایین یاخین گلسین

کی گول سولار گؤره بیر بوته خاری اؤز باشینا

عمومه خدمت ائله ، واحد ، آرتیب انسانلار

کی ، سانما ائل قازانیب اعتباری اوز باشینا

علی آقا واحد