ايندي کي، گئديرسن سون باهار کيمي
قاييتما گئرييه دورنالار کيمي
ياشا زيروه لرده، ياشا قار کيمي
چئوريليب ياغيشا، سئله قاييتما

ايللريم ناحاقدان اوتدو سنينله
دئميرم عومور- گون بيتدي سنينله
گئتدين، نغمه لريم گئتدي سنينله
ايندي غملي اوتن تئله قاييتما

سن گلدين عومرومه دومان، چن کيمي
ياشارسان ساچيما دوشن دن کيمي
باري بوندان بئله ياشا من کيمي
قوخلاييب آتديغين گوله قاييتما

یازان:  نصرت کسمنلی